काठमाडौं, फागुन १२ — आगामी फागुन २१ गते हुने प्रतिनिधिसभा सदस्य निर्वाचनका लागि आवश्यक छपाइ सामग्री निर्वाचन आयोगमा आउन सुरु भएको छ।

निर्वाचन आयोगका सहायक प्रवक्ता कुलबहादुर जिसीका अनुसार कमलादीस्थित नेपाल प्रज्ञा प्रतिष्ठानको छापाखानामा मतदान निर्देशिका, मतगणना निर्देशिका, निर्वाचनसम्बन्धी ऐन, नियम र अन्य आवश्यक निर्देशिका आवश्यक मात्रामा छापिइसकेको छ। पहिलो चरणमा पाँच हजार छपाइ सामग्री आयोगमा आएको उनले जानकारी दिए।

आयोगले छपाइ सामग्री ७७ वटै जिल्लामा पठाउने तयारी गरेको छ। बाँकी छपाइ सामग्री क्रमशः आएपछि जिल्लातिर वितरण गरिने योजना रहेको छ।

मतपत्रको छपाइ भने जनक शिक्षा सामग्री केन्द्र लिमिटेडमा भइरहेको आयोगले जनाएको छ। छपाइ पूरा भएसँगै निर्वाचनका लागि सबै सामग्री तयारी अवस्थामा राखिने बताइएको छ।