श्रीनगर, सल्यान । आगामी निर्वाचनलाई लक्षित गर्दै नेपाल कम्युनिष्ट पार्टी (माओवादी) सल्यानले आफ्नो सांगठनिक र चुनावी गतिविधिलाई निकै तीव्रता दिएको छ। हिजो जिल्लाका तीन स्थानीय तहमा ३१औँ भव्य जनयुद्ध दिवस मनाएको माओवादीले आज शारदा नगरपालिका-१ श्रीनगरमा महत्वपूर्ण जिल्ला स्तरीय निर्वाचन केन्द्रित बैठक सम्पन्न गरेको छ।

श्रीनगर बैठक: संगठन सुदृढीकरण र घरदैलोको निर्णय

शारदा-१ श्रीनगरमा आयोजित उक्त बैठकले निर्वाचन जित्नका लागि सम्पूर्ण शक्ति परिचालन गर्ने उद्घोष गरेको छ। बैठकले संगठन सुदृढीकरण, टोल-टोलमा घरदैलो अभियान र जनताका एजेण्डालाई केन्द्रमा राखेर चुनावी मैदानमा उत्रिने ठोस निर्णय गरेको छ।

बैठकका प्रमुख अतिथि एवं पूर्वी कर्णाली प्रदेश इन्चार्ज मोहलाल चन्द (आधार सी) ले आगामी निर्वाचन परिवर्तनका एजेण्डा संस्थागत गर्ने सुनौलो अवसर भएको बताउनुभयो। उहाँले भन्नुभयो, "हामीले प्राप्त गरेका उपलब्धि जोगाउन र थप अधिकार सुनिश्चित गर्न, अग्राधिकार सहितको संघियता प्राप्त गर्दै, जनताको विश्वास जित्नुको विकल्प छैन, त्यसैले सबै नेता-कार्यकर्ता एकताबद्ध भएर जनताको घरदैलोमा पुग्नुपर्छ।"

'गुलाफ' चिन्ह र नेतृत्वको प्रतिबद्धता

जिल्ला सेक्रेटरी भीम भारती (भीमसेन सी) को अध्यक्षतामा भएको बैठकमा उहाँले माओवादी नै वास्तविक परिवर्तनको संवाहक भएको दाबी गर्नुभयो। भारतीले आगामी निर्वाचनमा पार्टीका उम्मेदवारहरूलाई ‘गुलाफचिन्हमा मतदान गरी विजयी गराउन सम्पूर्ण जिल्लाबासीलाई आग्रह गर्दै भन्नुभयो, "हामी विकास, सुशासन र परिवर्तनका एजेण्डा लिएर आउँदैछौँ, हाम्रो जित नै जनताको जित हो ।"

जनयुद्ध दिवसको उत्साह र बढ्दो जनलहर

यसअघि हिजो मात्रै माओवादीले छत्रेश्वरी गाउँपालिकाको ३ नम्बर वडा (झिम्पे, पेदिखोला), कुमाखको ६ नम्बर वडा (पिमकाटिया), बागचौरको ६ नम्वर वडा (हिमचौर) र दार्माको जलेखर्कमा भव्य जनभेटघाट सहित ३१औँ जनयुद्ध दिवस मनाएको थियो। उक्त कार्यक्रमहरूमा देखिएको सहिद परिवार, घाइते योद्धा र आम जनसमुदायको व्यापक उपस्थितिले सल्यानमा माओवादीको प्रभाव निकै मजबुत बन्दै गएको पुष्टि गरेको छ। सोही उत्साहलाई चुनावी परिणाममा बदल्न आजको श्रीनगर बैठकले थप ऊर्जा थपेको नेताहरूको बुझाइ छ।

हेभीवेट नेताहरूको उपस्थिति

बैठकमा पोलिटब्युरो सदस्य तथा प्रतिनिधि सभा सदस्य पदका उम्मेदवार असल क्षेत्री, पोलिटब्युरो सदस्य एवं समानुपातिक उम्मेदवार बन्दु चन्द, केन्द्रीय सदस्य तथा समानुपातिक उम्मेदवार सीता शाह खड्का (पूर्णिमा), केन्द्रीय सदस्य तथा जिल्ला इन्चार्ज तेजबहादुर खड्का (अनिल सी) र मदन सी लगायतका शीर्ष नेतृत्वको सहभागिता रहेको थियो।

हिजोको जनयुद्ध दिवसको उल्लास र आजको रणनीतिक बैठकले सल्यानमा माओवादी अन्य दलभन्दा निकै अगाडि देखिएको छ। बैठकले आगामी दिनमा मतदाता भेटघाट र संगठन विस्तारलाई तिव्र स्तरमा लैजाने निर्णय समेत गरेको छ।