त्रिभुवन अन्तर्राष्ट्रिय विमानस्थलबाट अवैध लागूऔषध गाँजा तस्करी गर्न खोज्ने तीन जना भारतीय नागरिकलाई प्रहरीले पक्राउ गरेको छ। विमानस्थलको आगमन टनेल गेटबाट करिब ११ किलो २ सय ७० ग्राम गाँजा जस्तो देखिने वस्तुसहित उनीहरूलाई शुक्रबार बिहान नियन्त्रणमा लिइएको हो।

पक्राउ पर्नेहरूमा ४३ वर्षीया समिना अख्तर बेग मिर्जा, २४ वर्षीय मोहम्मद जुनैद र ४४ वर्षीया अफसाना आमिर हुसैन शेख रहेका छन्। विमानस्थल सुरक्षा कार्यालय र लागूऔषध नियन्त्रण ब्यूरोबाट खटिएको संयुक्त प्रहरी टोलीले शंका लागेर जाँच गर्दा उनीहरूको साथबाट उक्त परिमाणको लागूऔषध फेला पारेको हो।

प्रहरीका अनुसार मोहम्मद जुनैद र समिना अख्तरको साथबाट ३ किलो ८ सय ७० ग्राम तथा अफसानाको साथबाट ७ किलो ४ सय ग्राम गाँजा बरामद भएको छ। पक्राउ परेका तीनै जनालाई थप अनुसन्धान र कानुनी कारबाहीका लागि कोटेश्वरस्थित लागूऔषध नियन्त्रण ब्यूरोमा पठाइएको छ।