आगामी फागुन २१ गते हुने प्रतिनिधिसभा सदस्य निर्वाचनका लागि ललितपुर जिल्लामा कूल दुई लाख ६९ हजार २५६ मतदाता रहेका छन्। निर्वाचन कार्यालयका अनुसार तीमध्ये एक लाख ३१ हजार ५४९ महिला र एक लाख ३७ हजार ७०७ पुरुष मतदाता रहेका छन्।

जिल्लाभरका तीनवटै निर्वाचन क्षेत्रबाट कूल ७४ जनाले उम्मेदवारी दर्ता गराएका छन्। ललितपुर क्षेत्र नम्बर १ मा ३८ हजार ८४० महिला र ३८ हजार ८९७ पुरुष गरी जम्मा ७७ हजार ७३७ मतदाता रहेका छन्। यस क्षेत्रमा विभिन्न राजनीतिक दलबाट १६ जना र १२ जना स्वतन्त्र गरी कूल २८ जनाले उम्मेदवारी दर्ता गराएका छन्। तीमध्ये तीन जना महिला उम्मेदवार रहेका छन्।

ललितपुर क्षेत्र नम्बर २ मा ४३ हजार २९८ महिला र ४५ हजार ७८४ पुरुष गरी जम्मा ८९ हजार ८२ मतदाता छन्। यहाँ राजनीतिक दलबाट १६ जना र सात जना स्वतन्त्र गरी कूल २३ जनाको उम्मेदवारी परेको छ। यस क्षेत्रमा महिला उम्मेदवारको संख्या दुई जना मात्र रहेको छ।

त्यसैगरी ललितपुर क्षेत्र नम्बर ३ मा ४९ हजार ४११ महिला र ५३ हजार २६ पुरुष गरी जम्मा एक लाख दुई हजार ४३७ मतदाता रहेका छन्। यस क्षेत्रमा कूल २३ जनाले उम्मेदवारी दर्ता गराएका छन्, जसमा १६ जना राजनीतिक दलका र सात जना स्वतन्त्र उम्मेदवार रहेका छन्। यस क्षेत्रबाट पाँच जना महिला उम्मेदवार चुनावी प्रतिस्पर्धामा छन्।

ललितपुरका तीनवटै निर्वाचन क्षेत्रमा जम्मा ३१८ मतदान केन्द्र तोकिएका छन्। निर्वाचनलाई निष्पक्ष, शान्तिपूर्ण र व्यवस्थित बनाउन तयारी तीव्र पारिएको निर्वाचन कार्यालयले जनाएको छ।