नेपाली कम्युनिस्ट पार्टी निकट विद्यार्थी संगठनका विद्यार्थीहरूले त्रिभुवन विश्वविद्यालयका उपकुलपति, रेक्टर र रजिष्ट्रारको कार्यालयमा एक सातादेखि तालाबन्दी गरेका छन्। चार विभाग—अन्तर्राष्ट्रिय सम्बन्ध तथा कूटनीति, लैंगिक अध्ययन, सामाजिक कार्य तथा द्वन्द्व, शान्ति र विकास—को शुल्क घटाउने सहमति कार्यान्वयन नभएको आरोप उनीहरूको छ।

तालाबन्दीपछि उपकुलपति प्रा. डा. दीपक अर्याल, रेक्टर प्रा. केदार रिजाल र रजिष्ट्रार प्रा.डा. खड्क केसी विभिन्न विभागका कोठाबाट काम गरिरहेका छन्। उपकुलपति अर्यालले शुल्क घटाउने प्रक्रिया सुरु भए पनि कानुनी र आर्थिक प्रक्रिया पूरा गर्न समय लाग्ने बताएका छन्।

यसअघि कार्यक्रमका रूपमा सञ्चालन हुँदै आएका ती विषयमा वार्षिक एक लाख ७० हजार रुपैयाँभन्दा बढी शुल्क लाग्थ्यो। विभाग बनाएपछि शुल्क घटाउनुपर्ने मागसहित विद्यार्थीहरूले आन्दोलन गरेका थिए। त्यसपछि वार्षिक शुल्क एक लाख १० हजार रुपैयाँसम्म बनाउने सहमति भएको थियो।

तर सहमति कार्यान्वयन नभएको भन्दै विद्यार्थीहरूले तालाबन्दी गरेका हुन्। त्रिवि प्रशासनले सिनेटबाट स्वीकृति पाएपछि मात्र शुल्क घटाउने निर्णय लागू हुने बताएको छ। उता विद्यार्थी नेताहरूले सहमति लत्याइएको दाबी गर्दै बाध्य भएर तालाबन्दी गर्नुपरेको बताएका छन्।