काठमाडौँ । नेपाली कांग्रेसका पाँच प्रदेश सभापति र ४७ जिल्ला सभापतिले नियमित महाधिवेशनको पक्षमा आफूहरू रहेको स्पष्ट पारेका छन्। शनिबार संयुक्त विज्ञप्ति जारी गर्दै उनीहरूले पार्टीभित्र देखिएको विवादका बीच नियमित महाधिवेशनकै प्रक्रियालाई अघि बढाउनुपर्ने धारणा सार्वजनिक गरेका हुन्।

विज्ञप्तिमा उनीहरूले अहिले सबै नेता–कार्यकर्ता पार्टी जोगाउन केन्द्रित हुनुपर्नेमा जोड दिएका छन्। “पार्टीलाई विभाजनतर्फ धकेल्ने कुनै पनि गतिविधि उपयुक्त हुँदैन,” विज्ञप्तिमा उल्लेख छ।

सभापतिहरूले २०८२ पुस १८ गते बसेको नेपाली कांग्रेस केन्द्रीय कार्यसम्पादन समितिको बैठकले १५औँ नियमित महाधिवेशन २०८३ वैशाख मसान्तसम्म सम्पन्न गर्ने कार्यतालिका तय गरिसकेको स्मरण गराएका छन्। नियमित अधिवेशनकै प्रक्रिया निरन्तर रहेको अवस्थामा विशेष महाधिवेशन बोलाउने वैधानिक अधिकार केन्द्रीय तहमा मात्र रहेको र त्यसका लागि उपयुक्त वातावरणसमेत नरहेको उनीहरूको भनाइ छ।

विज्ञप्तिमा पार्टी नेतृत्वलाई एकताको प्रयासलाई अझ बलियो बनाउन, वार्ता र सहमतिमार्फत उत्पन्न संकट समाधान गर्दै पार्टीलाई विभाजनबाट जोगाउन केन्द्रित हुन आग्रह गरिएको छ।