काठमाडौं – छिमेकी मुलुक भारतले आज (सोमबार) आफ्नो ७७ औं गणतन्त्र दिवस मनाइरहेको छ। यसै दिन सन् १९५० मा भारतीय संविधान लागू भएको थियो।

भारतको राजधानी दिल्लीमा कार्यक्रम भारतीय समयअनुसार बिहान साढे १० बजे सुरू भएर करिब ९० मिनेटसम्म चल्नेछ। समारोहमा भारतीय राष्ट्रपति द्रौपदी मुर्मुले अगुवाइ गर्ने छन् भने युरोपियन काउन्सिलका अध्यक्ष एन्टोनियो लुईस सान्तोस दा कोस्टा र युरोपियन आयोगका अध्यक्ष उर्सुला वान डेर लेयेन मुख्य अतिथि रहेका छन्।

गणतन्त्र दिवस समारोहमा देशको विकास यात्रा, सांस्कृतिक विविधता र सैन्य शक्तिको प्रदर्शन हुनेछ। परेडमा हालै गठन भएका सैन्य इकाइहरू र ‘अपरेशन सिन्दुर’ क्रममा तैनाथ प्रमुख हथियार प्रणालीहरूको मोडल पनि प्रदर्शन गरिनेछ।

समारोहको सुरुवात अघि झण्डै १०० सांस्कृतिक कलाकारहरूले *‘विविधतामा एकता’* विषयमा प्रस्तुति दिने बीबीसी हिन्दीले उल्लेख गरेको छ।

यसै अवसरमा भारतीय प्रधानमन्त्री नरेन्द्र मोदीले सामाजिक सञ्जाल एक्समार्फत् देशवासीलाई बधाई दिएका छन्। उनले भनेका छन्, *“भारतको आन–बान र शानको प्रतीक यो राष्ट्रिय महापर्वले तपाईं सबैको जीवनमा नयाँ ऊर्जा र उत्साहको सञ्चार गरोस्। विकसित भारतको संकल्प अझै अधिक सुदृढ होस्।”*