जनमत पार्टीका नेता एवं पूर्वमुख्यमन्त्री सतिश सिंह मधेश प्रदेश प्रमधदेश सभाबाट राजीनामा दिने तयारीमा छन् ।  जनमत पार्टीका अध्यक्ष डा.सीके राउतले मुख्यमन्त्री पदबाट हटाएपछि नेता सिंह असन्तुष्ट छन् ।

मुख्यमन्त्रीबाट हटाइएकै बेला उनले राजीनामा दिने मुड बनाइसकेका थिए, तर प्रतिनिधि सभाको चुनावमा भाग लिने गरी अलि पछि राजीनामा दिने भनेर उनी पछि हटेका थिए । 

फागुन २१ गते हुन लागेको प्रतिनिधिसभा निर्वाचनमा भाग लिन उनी राजीनामा दिने तयारीमा पुगेका हुन् । माघ १ गते प्रदेश सभा सदस्यबाट आफूले राजीनामा दिने उनले बताएका छन् । उनले, ‘चुनावमा भाग लिने भनी माघ १ गते राजीनामा दिनेछु, त्यसको तयारी गरिरहेको छु ।’

पार्टी अध्यक्ष राउतकै कारणले राजीनामा दिन लागेको हो भन्ने प्रश्नमा उनले यसबारे स्वीकार त गरेनन् तर प्रदेश सभामा काम गर्ने अवस्था नभएको स्विकारे । भने, ‘म जहाँ जुन पार्टीबाट प्रदेश सभामा छु, त्यहाँ काम गर्ने वतावरण छैन, त्यहाँको किचकिच सहनुभन्दा आफै बाटो लाग्नु राम्रो । प्रतिनिधिसभा चुनाव मेरा लागि एउटा मौका हो, यसलाईं म सदुपयोग गर्छु ।’

प्रदेश सभाको सदस्यबाट राजीनामा दिइसकेपछि जनमत पार्टीसँगको सम्बन्ध पनि तोडिने उनले बताए । प्रदेश सभाबाट राजीनामा दिइसकेपछि जनमतसँग कुनै सम्बन्ध पनि नरहने उनले खुलाए । मुख्यमन्त्रीबाट हटाइएपछि नै पार्टीसँग औपचारिक सम्बन्ध नराखेका उनले छुट्टिएर अर्को पार्टी बनाउँदा राउतले आफूहरूमाथि मुद्दासमेत लगाएकाले त्यहाँ बस्नुको औचित्य सकिएको तर्क गरे । 

प्रदेश सभामै रहेर फेरि अर्को पार्टीमा जानु भनेको नैतिकताले पनि नमान्ने उनको बुझाइ छ । त्यसैले प्रदेशसभा सदस्यबाट हटेपछि 'स्वभिमान पार्टीमा' सक्रिय हुने उनले  बताए । नेता सिंहले आफ्ना भाइ सत्यवान सिंहको नेतृत्वमा स्वभिमान पार्टी दर्ता गराएर राखेका छन् र सप्तरी–२ बाट चुनाव लड्ने तयारीमा छन् ।  

नेता सिंहनिकट एक नेताका अनुसार जनमतका अध्यक्ष राउत जहाँबाट चुनाव लड्छन् त्यही क्षेत्रबाट नेता सिंह पनि लड्नेछन् । राउत यस पटक पनि सप्तरी–२ बाटै निर्वाचनमा उठ्ने तयारीमा छन् । राउतले २०७९ को प्रतिनिधिसभा निर्वाचनमा यहाँ जसपा नेपालका अध्यक्ष उपेन्द्र यादवलाई हराएका थिए ।