मर्स्याङ्दी बेसि जलविद्युत आयोजनाविरुद्ध स्थानीयको कडा विरोध, संघर्ष समिति गठन
लमजुङ । लमजुङको सदरमुकाम बेसीसहरमा निर्माण सुरु भएको ५० मेगावाट क्षमताको 'मर्स्याङ्दी बेसी जलविद्युत आयोजना' लाई लिएर स्थानीय बासिन्दा आन्दोलित बनेका छन्। बेसीसहर नगरपालिका-६ बेलौतीदेखि वडा नं. १० सालडाडासम्म फैलिएको यो आयोजनाको निर्माण कार्य एशियन पावर पार्टनर्स (APP) ले सुरु गरेपछि स्थानीयले वातावरणीय र सामाजिक सन्तुलनमा गम्भीर असर पर्ने भन्दै विरोध जनाएका हुन्।
स्थानीय तह र सरोकारवालासँग पर्याप्त छलफल नगरी कम्पनीले काम अघि बढाएको आरोप लगाउँदै नगरबासीले आज मिति २०८२/०७/२७ गते लमजुङ सदरमुकाम बेसिसहरमा स्थानियहरुको भेला बसि 'मर्स्याङ्दी बचाऔँ अभियान' अन्तर्गत संघर्ष समिति गठन गरी बेसीसहर नगरपालिका र जिल्ला प्रशासन कार्यालय लमजुङमा औपचारिक ज्ञापनपत्र बुझाएका छन्।
स्थानीयको मुख्य चिन्ता र असन्तुष्टि
स्थानीयहरूका अनुसार, यो आयोजना बन्न लागेको क्षेत्र सदरमुकाम बेसीसहरकै फोहोर व्यवस्थापन डम्पिङ साइट, मसानघाट र गङ्गा स्नान हुने धार्मिक क्षेत्र हो। यस्तो संवेदनशील स्थानमा आयोजना निर्माण गर्दा वातावरणीय, धार्मिक तथा सामाजिक सन्तुलनमा गम्भीर र दीर्घकालीन असर पर्ने उनीहरूको भनाइ छ।
१. नदी सुक्ने र सौन्दर्य गुम्ने खतरा:
आयोजनाका लागि मर्स्याङ्दी नदीलाई सुरुङमार्फत मोडिँदा बेसीसहर बजार हुँदै बग्ने प्राकृतिक नदी मार्ग सुक्ने र मरुभूमिमा परिणत भई बजारको सौन्दर्यता समाप्त हुने चिन्ता स्थानीयले व्यक्त गरेका छन्। नदी सुक्दा बजार क्षेत्रको प्राकृतिक सौन्दर्य हराउने र अहिलेको हरियाली भू-भाग मरुभूमीमा परिणत हुने स्थानीयको दाबी छ।
अघिल्ला मर्स्याङ्दी र माथिल्लो मर्स्याङ्दी आयोजना बनेपछि आसपासका बस्तिहरुको सौन्दर्यता घटेको, पानीका मुहानहरु सुकेको, खेतीयोग्य जमिनमा ह्रास आएको, नदी सुकेको अनुभव सुनाउँदै स्थानियहरुले यस आयोजनाले पनि सदरमुकामको वातावरणीय सन्तुलन र जनस्वास्थ्य दुवैमा खतरा ल्याउने चेतावनी दिएका छन्।
पानीको मुहान र सुख्खापन:
आयोजना निर्माण सुरु भएपछि स-साना पानीका मुहान सुक्ने र सुख्खापन बढ्ने निश्चित भएको स्थानीयको भनाइ छ।यसले हराभरा वातावरणमा दीर्घकालीन असर पार्ने ठहर नगरबासीको छ।
कम्पनी र सरोकारवाला निकायमाथि आरोप
स्थानीयले स्थानीय तह र अन्य सरोकारवाला निकायले "यहाँ आयोजना बनाउन हुँदैन" भन्ने आवाज नउठाएको भन्दै आपत्ति जनाएका छन्। उनीहरूले यसकै फाइदा उठाएर कम्पनीले स्थानीयको आवाजलाई बेवास्ता गर्दै बेखबर रूपमा काम अघि बढाएको आरोप लगाएका छन्।
नगरबासीको भेलाले गठन गरेको संघर्ष समितिले स्थानीय सरकार र प्रशासनलाई तत्काल निर्माण कार्य रोकेर मर्स्याङ्दी बचाउउने र प्राकृतिक हराबरा बाताबरण नबिगार्ने स्थानियको जायज मुद्दालाई सम्बोधन गर्न माग गरेको छ।
