गैरआवासीय नेपाली संघ (एनआरएनए) ले नेपालमा करिब एक खर्ब रुपैयाँभन्दा बढी को लगानी भित्र्याएको तथ्याङ्क सार्वजनिक गरेको छ।एनआरएनएले आफ्नो २२ औँ स्थापना दिवस को अवसर पारेर शनिबार काठमाडौँमा आयोजित पत्रकार सम्मेलनमा सो तथ्याङ्क सार्वजनिक गरेको हो।

पत्रकार सम्मेलनमा बोल्दै एनआरएनएका अध्यक्ष डा. बद्री केसीले नेपालको अर्थतन्त्रमा ठुलो सुधार ल्याउनका लागि आफूहरूले जोड दिएको बताए। उनले गैरआवासीय नेपालीहरूले आफूले सिकेको सीपको पनि नेपालमा अधिकतम उपयोग गर्न सक्दो प्रयास गरिरहेको जानकारी दिए। अध्यक्ष केसीले नेपालमा लगानी बढाउन आफूहरू प्रतिबद्ध रहेको बताए।

उनले भने, ‘हामीले कमाएको केही अंश मात्रै पनि नेपालमा पठायौँ भने नेपालको अर्थतन्त्रमा धेरै ठुलो सुधार हुन्छ भन्ने हाम्रो पहिलो एजेन्डा हो। अहिलेको अवस्थामा नेपालमा १ खर्बभन्दा बढी गैरआवासीय नेपालीहरूको शिक्षा, बैङ्किङ, कृषि, हाइड्रो लगायतका विभिन्न क्षेत्रमा लगानी छ।’

उनले उदाहरण दिँदै भने, ‘यदि नेपालमा कुनै पनि दुर्गम ठाउँमा पनि आधुनिक, सफा क्याफे देख्नुहुन्छ भने त्यो गैरआवासीय नेपालीले खोलेको छ। यदि कहीँ आधुनिक कृषि देख्नुहुन्छ भने गैरआवासीयहरूले विदेशमा गएर सिकेर आएर गरेको छ।’ उनले विदेशी भूमिमा भन्दा नेपालमा नै बढी लगानी गर्नुपर्छ भनेर आफूहरू लागेको बताए।

एनआरएनएले आफूहरूले विश्वभर नेपालको पहिचान दिलाउन महत्त्वपूर्ण योगदान दिएको पनि दाबी गरेको छ। अध्यक्ष केसीले राजदूतावास नभएको ठाउँमा पनि नेपालीहरूले आफ्नो देशको पहिचान गराउने काम गरेको जिकिर गरे।