लन्डनको ऐतिहासिक युनिभर्सिटी अफ ग्रीनवीचमा भव्य रूपमा सम्पन्न भएको ‘नेपाल एजुकेशन अवार्ड्स युके २०२५’ समारोहमा डा. रमेश अधिकारी ‘बेस्ट प्रिन्सिपल अवार्ड २०२५’ द्वारा सम्मानित भएका छन् ।

युनिभर्सिटी अफ ग्रीनवीचमा कलेज रिडर्स पत्रिकाद्वारा आयोजित समारोहमा साउथ वेस्टर्न स्कुलका प्रिन्सिपल डा. रमेश अधिकारीलाई बेलायतका लागि नेपाली राजदूत चन्द्रकुमार घिमिरेको प्रमुख आतिथ्य तथा उक्त यूनिवर्सिटीका उपकुलपति प्रोफेसर जेन ह्यारिंगटन एबम विभिन्न नेपाली विश्वविद्यालयका उपकुलपति तथा पदाधिकारीहरूको विशेष उपस्थितिमा उक्त पदक द्वारा सम्मानित गरिएको हो।

नेपालमा शैक्षिक उन्नयनमा योगदान गर्ने व्यक्तित्वहरूलाई अन्तरराष्ट्रियस्तरमा सम्मानित गर्ने उपक्रम अन्तर्गत डा. अधिकारीलाई उक्त सम्मान गरिएको निर्णायक मण्डल (जुरी) का प्रमुख मधेश विश्वविद्यालयका उपकुलपति प्रा. डा. दीपक बहादुर शाक्यले बताए ।

समारोहलाई सम्बोधन गर्दै बेलायतका लागि नेपाली राजदूत चन्द्रकुमार घिमिरेले यी अवार्डहरू नेपाल-बेलायत साझेदारी र साझा मूल्यहरूको उत्सव भएको बताए । उनले नेपाली विद्यार्थीहरू विश्वस्तरमा प्रतिस्पर्धी बनेका र उनीहरूले ज्ञान सृजना र नवप्रवर्तनमार्फत नेपालको समाज र अर्थतन्त्रको विकासमा योगदान दिइरहेको बताए ।

‘उत्कृष्टताको कुनै सिमाना हुँदैन । नेपालमा कुनै पनि व्यक्ति पछि नपरोस् भन्ने उद्देश्यले ज्ञान सिर्जना र साझेदारी गरेर स्वतन्त्र र निष्पक्ष समाज निर्माण गर्ने दिशामा हामी अघि बढिरहेका छौँ। स्वतन्त्र, न्यायपूर्ण र समावेशी समाज निर्माण नै हाम्रो साझा लक्ष्य हो, जसले दुई देशबीचको मित्रतालाई अझ सुदृढ बनाउनेछ,’ उनले भने ।

ग्रिनविच विश्वविद्यालय १८९० मा ग्रिनविच पोलिटेक्निकका रूपमा स्थापना भएको एक जीवन्त सार्वजनिक संस्था हो, जसमा हाल १२५ भन्दा बढी देशका करिब २५,००० विद्यार्थी अध्ययनरत छन्।

समारोहमा कलेज रिडर्स पत्रिकाका कार्यकारी सम्पादक केशव नेपालले युकेको शैक्षिक परम्परा र सयौँ वर्ष पुरानो सभ्यताबाट नेपालले सिक्न सक्ने कुरा थुप्रै रहेको बताउँदै अहिले नेपाली शिक्षा क्षेत्रले पनि विश्वस्तरमा पहिचान बनाउँदै गएको बताए ।

युनिभर्सिटी अफ ग्रिनिचकी कार्यकारी निर्देशक (मार्केटिङ र विद्यार्थी सम्बन्ध) क्लेयर म्याथ्यूजले नेपालका शैक्षिक संस्थाहरूसँग दीर्घकालीन साझेदारीका लागि आफ्नो विश्वविद्यालय उत्सुक रहेको बताए ।