इसराइलले गजाका विभिन्न क्षेत्रमा गरेको ताजा हवाई आक्रमणमा कम्तीमा १०४ जनाको मृत्यु भएको छ। बुधबार र बिहीबार गजा सिटी, खान युनिस, बेतलाहिया लगायत क्षेत्रहरूमा निरन्तर बमबारी भएपछि ठूलो संख्यामा सर्वसाधारणको ज्यान गएको अन्तर्राष्ट्रिय समाचार संस्था रोयटर्स ले जनाएको छ।

इसराइली सेनाले (आईडीएफ) ती आक्रमणहरू हमासले हतियार भण्डारण गरिरहेको ठाँउ लक्षित गरी गरिएको दाबी गरेको छ। उत्तरी गजामा रहेको एक गोदाममा विस्फोटक र मिसाइल राखिएको सूचना पाएपछि हवाई कारबाही गरिएको इसराइली सेनाको भनाइ छ।

आईडीएफका अनुसार, हमासका एक लडाकूले गोली प्रहार गरी एक इसराइली सैनिकको हत्या गरेपछि जबाफी कारबाहीका रूपमा यो आक्रमण गरिएको हो। इसराइली प्रधानमन्त्री बेन्जमिन नेतन्याहूले पनि हमासले युद्धविरामको उल्लंघन गरेको भन्दै आक्रमण गर्न निर्देशन दिएका थिए।

अमेरिकी राष्ट्रपति डोनाल्ड ट्रम्पले इसराइलको कारबाहीलाई उचित ठहर गर्दै भनेका छन्, “उनीहरूको सेना मारिएको छ, जबाफी कारबाही गर्नु उनीहरूको अधिकार हो। हमास सानो शक्ति हो, त्यसैले उसले आफ्ना गतिविधि सोचविचार गरेर अघि बढाउनुपर्छ।”

युद्धविराम घोषणा भएपछि इसराइली सेनाले गजाबाट फिर्ता गएर सीमामा निगरानी कायम राखेको थियो। तर, हालको आक्रमणले अमेरिकी मध्यस्थतामा भएको युद्धविरामको मर्मविपरीत कार्य भएको आरोप लगाइएको छ।

इसराइलले भने आफू युद्धविरामका सिद्धान्तप्रति प्रतिबद्ध रहेको बताउँदै “हमासको उक्साहट” का कारण सीमित कारबाही गरिएको दाबी गरेको छ।

गजामा युद्धविरामपछि हजारौं विस्थापित प्यालेस्टिनीहरू फर्किएका थिए, तर पछिल्ला आक्रमणपछि उनीहरू फेरि असुरक्षित महसुस गर्न थालेका छन्।

हमासले सबै जीवित बन्धकहरू फिर्ता गरिसकेको र मृत्यु भएकामध्ये २८ जनाका शव फिर्ता गरिएको जनाएको छ। बाँकी शवको पहिचान र खोजीका लागि समय लाग्ने बताएको छ। इसराइलले भने ती शव तुरुन्त फिर्ता गर्न दबाब दिँदै आएको छ।

इसराइलले हालैको आक्रमणमा सन् २०२३ अक्टोबर ७ मा इसराइलमाथि हमला गर्ने योजनामा संलग्न रहेको एक हमास कमान्डरलाई निशाना बनाइएको दाबी गरेको छ। तर, हमासले उक्त दाबी खारेज गर्दै यसलाई “राजनीतिक प्रचार” भनेको छ।

संयुक्त राष्ट्रसंघका तथ्यांक अनुसार, पछिल्ला एक वर्षयता गजामा इसराइली आक्रमणका कारण करिब **७० हजार मानिसको ज्यान** गइसकेको छ।