सिराहाको कल्याणपुर नगर प्रमुखविरुद्ध घुस लिएको आरोपमा मुद्दा दायर
अख्तियार दुरुपयोग अनुसन्धान आयोगले सिराहाको कल्याणपुर नगरपालिकाका नगर प्रमुख राम पुकार साहविरुद्ध विशेष अदालत, काठमाडौँमा आरोपपत्र दायर गरेको छ।
अख्तियारको कार्यालय, बर्दिवासबाट खटिएको टोलीले नगर प्रमुख साहलाई सेवाग्राहीबाट १ लाख रुपैयाँ घुस लिइसकेको अवस्थामा नियन्त्रणमा लिएको थियो। उनीमाथि वडा नम्बर ६ मा नाला निर्माण योजनाको काम सम्पन्न भएपछि भुक्तानी दिने क्रममा घुस मागेको उजुरी परेको थियो।
अनुसन्धानका क्रममा नगर प्रमुख राम पुकार साहले पक्की नाला निर्माणको कामको भुक्तानीका लागि सेवाग्राहीसँग १ लाख रुपैयाँ घुस/रिसवत मागेर लिएको पुष्टि भएको आयोगको भनाई छ।
अख्तियारले साहलाई भ्रष्टाचार निवारण ऐन, २०५९ को दफा ३ को उपदफा (१) बमोजिम कसुर गरेको भन्दै १ लाख रुपैयाँ बिगो कायम गरी सोही ऐनको दफा ३ को उपदफा (१) को देहाय (ख) बमोजिम कैद र बिगोअनुसार जरिवानाको मागदाबीसहित आरोपपत्र दायर गरेको हो।
