पूर्वराष्ट्रपति विद्यादेवी भण्डारीले एमाले अध्यक्ष केपी शर्मा ओलीलाई आफूबाहेक अरु केटाकेटी हुन् भन्ने परेको प्रतिक्रिया दिएकी छिन् । मंगलबार दिउँसो भंगालस्थित आफ्नै निवासमा केही पत्रकाहरूसँग कुरा गर्दै उनले ४ साउनको च्यासल बैठकका विषयसमेत उप्काएर प्रतिक्रिया दिएकी हुन् । 

उनले पार्टीको विधानले व्यवस्था गरेको दुई कार्यकाल र ७० वर्षे उमेर हदबारे ओली नेतृत्वमा पुगेपछि आफ्नै विचार बिर्सेको र अरुले पार्टी चलाउन सक्दैनन् भन्ने भान परेको बताइन् । ‘पार्टीभित्र आफूबाहेक अरु कोही जान्ने सुन्नै छैन भन्ने भ्रम उहाँलाई परेको छ,’ भण्डारीले भनिन् । 

उनले आफू पार्टीमा फर्किने र सक्रिय रूपमा राजनीतिमा आउने भन्नेबारे यसअघि नै पटक–पटक अध्यक्ष ओलीसँग कुरा भए पनि अहिले आएर उहाँले दिएका प्रतिक्रियाप्रति अचम्म लागेको बताइन् । उनले १४ असारमा पनि राष्ट्रिय सभागृहमा पार्टी सदस्यता नवीकरणबारे सार्वजनिक रूपमा बोल्दै सक्रिय राजनीतिमा फर्किएको घोषणा गर्नेबारे भन्दै छु भन्नेसमेत जानकारी गराएको बताइन् ।

‘त्यो बेला उहाँले हुन्न भन्नु भएन । नकारात्मक कुरा गर्नु भएन । ठीकै छ भन्नुभएको हो,’ उनले भनिन् । उनले भेटमा पार्टीको भावी नेतृत्वका बारेमा समेत कुरा हुने गरेको सुनाइन् । भण्डारीले आफू चीन भ्रमणमा जाँदा र आएपछि पनि बालुवाटार गएर अध्यक्ष ओलीसँग हार्दिक रूपमा संवाद भएको समेत बताइन् । 

यसका साथै उनले राष्ट्रपतिको कार्यकाल सकिएको ३ महिनाभित्रै पार्टी सदस्यता नवीकरण गरेको र यसबारे अध्यक्ष ओली जानकार रहेको बताइन् । उनले कोशी भ्रमण सकेर फर्किएपछि ओलीले पटक–पटक भेट्न आउँछु भन्दा पछि भेटौँला भन्दै आफूले प्रधानमन्त्रीलाई निवासमा बोलाएर सुरक्षाको तहमा अप्ठ्यारो नपारौँ भनेको पनि खुलाइन् ।

उनले च्यासल भेटबारे पनि खुलस्त बताउँदै आफूलाई बालुवाटारमै भेटौँ भन्ने कुरा अस्वीकार गरी च्यासलस्थित पार्टी कार्यालयमै भेट्ने निर्णय गरेको बताइन् । उक्त दिन आफूले २ बजे नै हिँड्न तयारी गरे पनि अर्को दिन भेट सार्ने प्रस्ताव आएको समेत भण्डारीले खुलाइन् । तर, उक्त प्रस्ताव अस्वीकार गरी सोही दिन नै भेटौँ भनेको उनले बताइन् । उक्त दिन पनि ओली १ घण्टा ढिलो च्यासल पुगेका थिए । भण्डारीले ओली भेट्न ३७ मिनेट कुर्नुपरेको थियो ।