शिक्षक तथा विद्यालय कर्मचारीहरूको आन्दोलनका कारण माध्यमिक शिक्षा परीक्षा (एसईई) को उत्तरपुस्तिका परीक्षणको काम प्रभावित हुने भएको छ । शिक्षकहरू चैत २० गतेदेखि काठमाडौँमा शैक्षिक सडक आन्दोलनमा छन् । उनीहरूले एसईई लगायत कुनै पनि परीक्षाका उत्तरपुस्तिका परीक्षण नगर्ने जनाएका छन् । जसले गर्दा एसइईको उत्तरपुस्तिका परीक्षणको काम प्रभावित हुने देखिएको हो । 

यो सातादेखि नै उत्तरपुस्तिका परीक्षणको काम अघि बढाउनुपर्ने हुन्छ । तर, नेपाल शिक्षक महासङ्घले भोलीबाट शैक्षिक हड्तालको घोषणा गरेको छ । उक्त समयमा कुनै प्रकारका उत्तरपुस्तिका परीक्षण नगर्ने, नतिजा प्रकाशन नगर्ने, तालिम गोष्ठीमा सहभागी नहुने, सेमिनार, शैक्षिक भ्रमण जस्ता कार्यक्रममा सहभागी नहुने जनाएका छन् । 

राष्ट्रिय परीक्षा बोर्डका अध्यक्ष डाक्टर महाश्रम शर्माले यो साताबाट कापी परीक्षणको काम नथालिए नतिजा प्रकाशन प्रभावित हुने बताए ।  ‘शिक्षकहरूले नै हो कापी परीक्षण गर्ने । उहाँहरू आन्दोलनमा हुनुहुन्छ । अहिले हामीले आन्तरिक काम गरिरहेका छौँ । भोली अफिस खुलेपछि छलफल गर्छौ,’ अध्यक्ष शर्माले भने ।

बोर्डले असार ७ गते एसइईको नतिजा प्रकाशन गर्ने कार्यतालिका छ । शिक्षकहरूको आन्दोलनका कारण उक्त मितिमा नतिजा प्रकाशन गर्न समस्या हुने उनको भनाइ छ । 

पाँच लाख विद्यार्थीका ३५ लाख थान उत्तरपुस्तिका परीक्षण गर्नुपर्ने हुन्छ । त्यसका लागि शिक्षकहरूलाई परीक्षणको जिम्मेवारी दिइन्छ । तर, महासङ्घले उत्तरपुस्तिका परीक्षण नगर्ने घोषणा गरेको हो । 

सरकार र आन्दोलनरत शिक्षकहरूबिच चार्ड वार्ता भएर आन्दोलन सकिने उनको विश्वास छ । यथाशीघ्र शिक्षा ऐन जारी गर्नुपर्ने माग अघि सारेर आन्दोलन गर्दै आएका शिक्षकहरूलाई सरकारले वार्तामा आउन आग्रह गरेको छ । तर, उनीहरूले वार्ताको कुनै औचित्य नरहेको बताएका हुन् । 

‘हामीलाई वार्ता चाहिएको होइन । ऐन चाहिएको हो । जे जसरी हुन्छ, ऐन चाहियो । एक थान ऐन हातमा नपरेसम्म हामी काठमाडौँको सडक छाड्दैनौँ,’ महासङ्घ अध्यक्ष लक्ष्मीकिशोर सुवेदीले भने ।