राष्ट्रिय स्वतन्त्र पार्टीको काठमाडौं जिल्लाका अधिवेशनसम्पन्न वडाका निर्वाचित पदाधिकारी एवं सदस्यहरूको शपथ ग्रहण कार्यक्रम सम्पन्न भएको छ । 

शुक्रबार पार्टीको केन्द्रीय कार्यालय, वनस्थलीमा काठमाडौं जिल्ला समितिको आयोजनामा सम्पन्न सो कार्यक्रममा काठमाडौंका ४१ वडाका २९५ निर्वाचित पदाधिकारी एवं सदस्यहरूलाई काठमाडौं जिल्ला सभापति प्रदीप बिस्टद्वारा सामूहिक शपथ ग्रहण गराइएको हो । 

उक्त कार्यक्रममा सम्बोधन गर्दै पार्टी कार्यवाहक सभापति डोल प्रसाद अर्यालले वडा अधिवेशनबाट निर्वाचित सबै पदाधिकारी तथा सदस्यहरूलाई आफ्नो जिम्मेवारी इमानदारीपूर्वक निर्वाह गर्न निर्देशन दिए । साथै समाजको लागि केही गर्छु भनेर राजनीतिमा आएका युवालाई सशक्त ढंगले अघि बढ्न अनुरोध गरे  । 

त्यसैगरी रास्वपाले जनताको भावना अनुसार काम गर्न वडा समितिले गर्नुपर्ने कामहरू थुप्रै रहेको उल्लेख गर्दै कार्यवाहक महामन्त्री कविन्द्र बुर्लाकोटीले बताए । 

उनले वडा समितिले वडा स्तरमा प्रशिक्षण कार्यक्रम, स्थानीय विकासका योजनाहरू तथा वडाका गतिविधिहरूको अनुगमन लगाएका कामहरू गर्नुपर्ने बताए ।  

 केन्द्रीय सदस्य, संसदीय दलका उपनेता एवं सांसद विराजभक्त श्रेष्ठले निर्वाचित सबै सदस्यहरूलाई शुभकामना दिँदै ८४ को निर्वाचनमा रास्वपालाई नम्बर १ पार्टी बनाउने गरी सबैले पार्टी हितको लागि काम गर्नुपर्ने बताए । सो अवसरमा बाग्मती प्रदेश सभापति डा. अच्तुतम लामिछाने लगायतका नेताहरूले मन्तव्य राखेका थिए ।

हालसम्म काठमाडौं जिल्लाका कूल १३८ वडाहरूमध्ये ८१ वटा वडामा राष्ट्रिय स्वतन्त्र पार्टीको वडा अधिवेशन सम्पन्न भई वडा समिति गठन भएको छ ।