पूर्वप्रधानमन्त्री एवम् नेपाली कांग्रेसका सभापति शेरबहादुर देउवाको भारत भ्रमण कार्यक्रम अन्तिम समयमा रद्द भएको छ । सत्तारूढ दलका नेता देउवाका प्रेस सल्लाहकार गोविन्द परियारले भारत भ्रमण कार्यक्रम रद्द भएको जानकारी खबरहबलाई दिए ।

छिमेकी भारत जारी महाकुम्भ मेलाको अवसर पारेर उनी बिहीबार दिउँसो भारत जाने तयारी थियो । उत्तर प्रदेश राज्यमा पर्ने प्रयागराजमा अहिले महाकुम्भ लागिरहेको छ ।

त्यही सन्दर्भमा उनी भारत जाने तयारी थियो तर त्यहाँ उच्चस्तरीय राजनीतिक भेटघाट नहुने भएपछि भ्रमण रद्द भएको हो । उनले भारतीय विदेशमन्त्री एस. जयशंकर र प्रधानमन्त्री नरेन्द्र मोदीसँग पनि भेट्नका लागि कूटनीतिक पहल गरेका थिए । तर त्यो नहुने भएसँगै देउवाको भारत भ्रमण रद्द भएको हो ।

सभापति देउवालाई इन्डिया फाउन्डेसनले ‘कुम्भ ग्लोबल समिट अन डेभलपमेन्ट एण्ड सस्टेइनबेलिटी’ कार्यक्रममा वक्ताको रूपमा आमन्त्रण गरेको थियो । त्यही कार्यक्रममा सहभागी हुँदै उनी प्रयागराजबाट दिल्लीसमेत जाने तयारी थियो ।

इन्डिया फाउन्डेसनको आयोजनामा आगामी शुक्रबार र शनिबार आयोजना हुन गइरहेको कार्यक्रममा उत्तर प्रदेशका मुख्यमन्त्री योगी आदित्यनाथ पनि सहभागी हुने तयारी थियो । उत्तर प्रदेशका मुख्यमन्त्रीसँग मात्रै भेट हुने भएपछि देउवाको भ्रमण रद्द भएको स्रोतले जनाएको छ ।

तत्कालीन प्रधानमन्त्री पुष्पकमल दाहाल प्रचण्डलाई पाखा लगाउन कांग्रेस र नेकपा एमालेले गत असार १७ गते राति ७ बुँदे सहमतिमा हस्ताक्षर गरेका थिए ।

त्यसपछि असार ३० गते एमाले अध्यक्ष केपी शर्मा ओली प्रधानमन्त्री बने । कांग्रेससँगको सहकार्यमा तेस्रो पटक प्रधानमन्त्री बनेका ओलीलाई भारतले अहिलेसम्म भ्रमणको निम्तो पठाएको छैन ।

देउवा पत्नी एवम् परराष्ट्रमन्त्री डा. आरजु राणा देउवाले पटक पटक पहल गरे पनि ओलीका लागि भारतले हरियो झन्डा नदेखाउँदा देउवाको पनि भ्रमण रद्द भएको हो ।

यही ४ फागुनमा परराष्ट्रमन्त्री डा. राणा र छिमेकी भारतीय विदेशमन्त्री एस. जयशंकरबीच ओमनको राजधानी मस्कटमा भेटवार्ता भएको थियो । उक्त भेटवार्तामा पनि दुई देशबीच सम्बन्ध बलियो बनाउने औपचारिकताका लागि कुरा भएको थियो ।

तर आठौँ हिन्द महासागरीय सम्मेलनमा भाग लिन पुगेका दुईजनाबीच ओलीको भ्रमणबारे कुरा हुन सकेन । भारतले ओलीलाई हरियो झन्डा नदेखाएको अवस्थामा देउवालाई पनि भारतीय उच्च नेताले भेट नदिने भएपछि भ्रमण रद्द गरिएको हो ।