झापाको बिर्तामोड नगरपालिकाका पूर्वमेयर ध्रुवकुमार शिवाकोटी नाबालिगलाई बलात्कार गरेको आरोपमा पक्रउ परेका छन् । घरमा काम गर्न राखेको नाबालिगलाई पटक पटक बलातत्कार गरेको आरोपमा उनलाई प्रहरीले सोमबार पक्राउ गरेको हो ।

जिल्ला प्रहरी कार्यालय झापाका प्रवक्ता एवम् डीएसपी कृष्णकुमार चन्दका अनुसार उनलाई सोमबार पक्राउ गरिएको हो । ती नाबालिगको उमेर प्रहरीले खुलाएको छैन । तर उनी १७ वर्षकी रहेको जानकारी आएको छ ।

प्रहरीका अनुसार नाबालिगका बुवाआमा दुवै साथमा थिएनन् । शिवाकोटीले पढाइदिने सर्तमा उनलाई राखेका थिए । ती नाबालिगलाई कलेज ड्रेसमै काँकडभिट्टाबाट भारत जान खोज्दै गर्दा नियन्त्रणमा लिइएको थियो ।

नेपालको कानुनले १८ वर्षमुनिका बालिकासँग सहमतिमै यौन सम्बन्ध राखे पनि त्यो बलात्कार ठहर्छ । १८ वर्षभन्दा माथिका महिलासँग मञ्जुरीबिना राखेको यौन सम्बन्ध बलात्कार हुन्छ ।

त्यसपछि बुझ्दा उनले आफूलाई पूर्वमेयर शिवाकोटीले करणी गरेको बयान प्रहरीलाई दिएकी थिइन् । उनकी आमा भारतमा भएकाले त्यहाँ जान लागेको बताएकी प्रहरीले जनाएको छ।

शिवाकोटी २०७४ सालमा नेकपा एमालेको तर्फबाट बिर्तामोड नगरपालिकाको मेयरमा निर्वाचित भएका थिए । शिवाकोटीको घर बिर्तामोड नगरपालिका-५ शनिश्‍चरे रोड हो ।