भारतमा निवार्सित जीवन बिताइरहेकी बंगलादेशकी पूर्वप्रधानमन्त्री शेख हसिनामाथि अर्को आरोप लागेको छ । ३ हजार ५ सय जना बेपत्ता भएको मामिलामा हसिनाको हात रहेको मोहम्मद युनुसको नेतृत्वको बंगलादेशको अन्तरिम सरकारले भनेको छ । 

छानबिनमा पनि यो कुरा प्रमाणित भएको बताइएको छ । जबरजस्ती बेपत्ताका घटनामा छानबिन आयोगले अनुसन्धान गरेको थियो । यी मामिलामा हसिना र अन्य कयौँ वरिष्ठ अधिकारीहरू संलग्न रहेको ‘सत्यको खुलासा’ शीर्षकको प्रतिवेदनमा भनिएको छ ।

ढाकास्थित स्टेट गेष्ट हाउस जमुनामा आयोजित कार्यक्रममा अन्तरिम सरकारका प्रमुख सल्लाहकार प्रोफेसर मुहम्मद युनुसलाई आयोगका अध्यक्ष न्यायाधीश मैनुल इस्लाम चौधरीले छानबिन प्रतिवेदन बुझाएका थिए । जबरजस्ती बेपत्ता पारिएको भन्दै १ हजार ६ सय ७६ वटा उजुरी प्राप्त भएकोमा हालसम्म ७ सय ५८ वटा उजुरीमा छानबिन भएको आयोगले भनेको छ । बेपत्ता हुनेको कुल संख्या ३ हजार ५ सय नाघेको अनुमान आयोगको छ । भूमिका विवादास्पद भएकाले र्या‍पिड एक्सन बटालियन (रब)लाई खारेज गर्न पनि प्रतिवेदनमा सिफारिस गरिएको छ ।