भुटानी राजा जिग्मे खेसार नाम्ग्याल वाङ्चुक बिहीबार नेपाल आउन लागेका छन् । तर उनी नेपाल भ्रमणमा नभएर भारत भ्रमणमा जान लागेको बेला ट्रान्जिटका लागि एक घण्टा नेपालमा रहने बताइएको हो ।

भुटानी राजा नेपाल आउने भएपछि विमानस्थलको सुरक्षा व्यवस्था कडा बनाइएको छ । यद्यपि उनी एक घण्टा नेपालमा रहे पनि कसैसँग औपचारिक भेटघाटको कार्यक्रम नरहेको परराष्ट्र मन्त्रालय स्रोतले जनाएको छ । 

परराष्ट्र मन्त्रालयका एक अधिकारीले भने, ‘भुटानका नरेश नेपाल आउँदै हुनुहुन्छ भन्ने हाम्रो जानकारीमा छ तर नेपाल उहाँको ट्रान्जिट भएको कारण हालसम्म कुनै पनि औपचारिक भेटघाटको कार्यक्रम राखिएको छैन ।’

नेपालका प्रधानमन्त्री केपी शर्मा अ‍ोली चीन भ्रमणमा रहेको बेला भुटानी राजा भारत भ्रमणमा गइरहेका छन् । यो विषयलाई धेरैले चासोको रूपमा लिएका छन् ।

चीन र भुटानबिच सीमा विवाद रहेको छ । सो विवादमा भारतमा जोडिएको छ । सोही सीमा विवादको विषयमा कुराकानी गर्नका लागि भुटानी राजा जिग्मे भारत भ्रमणमा जान लागेको बताइएको छ ।

भुटानी राजा जिग्मेको भ्रमणबारे भारतको विदेश मन्त्रालयले औपचारिक घोषणा गरिसकेको छ । भटानी राजा जिग्मे र भारतका प्रधानमन्त्री नरेन्द्र मोदी बिच भेटवार्ता हुने तय भइसकेको छ । 

उनले त्यहाँका विदेश मन्त्री एस जयशंकरसँग पनि भेटवार्ता गर्ने बताइएको छ । भुटानी राजा जिग्मे शुक्रवार स्वदेश फर्किनेछन् ।

यसअघि नै भुटानका प्रधानमन्त्री छिरिङ तोब्गेले भारतको भ्रमण गरेका थिए । उनीभन्दा पहिले भारतमा रहेका चिनियाँ राजदूत सु फेइहोङले पनि भुटानको भ्रमण गरेका थिए ।

यता, पूर्व राजा ज्ञानेन्द्र शाहले गत असोजमा भुटानको भ्रमण गरेका थिए । भ्रमणको क्रममा भुटानले ज्ञानेन्द्रलाई राजकीय सम्मान दिएको थियो ।