काठमाडौं । मधेश प्रदेशका मुख्यमन्त्री सरोजकुमार यादवले बुधबार पाँचौं पटक विश्वासको मत लिन लाग्नुभएको छ । 

केन्द्रमा सत्ता गठबन्धन फेरिएसँगै उहाँले बुधबार डेढ वर्षको अवधिमा पाँचौं पटक विश्वासको मत लिन लाग्नुभएको हो। ​पछिल्लो पटक सत्ता गठबन्धन मध्येका नेकपा एमाले र नेकपा माओवादी केन्द्रले समर्थन फिर्ता लिएर सरकारबाट बाहिरिएपछि यादवले पुनः विश्वासको मत लिनुपर्ने अवस्था आएको छ।

कुनै दलले सरकारलाई दिएको समर्थन फिर्ता लिएमा ३० दिनभित्र विश्वासको मत लिनुपर्ने संवैधानिक व्यवस्थाअनुसार मुख्यमन्त्री यादवले बुधबार दिउँसो ३ बजे विश्वासको मत लिने कार्यसूची रहेको प्रदेशसभा सचिवालयका सूचना अधिकारी चन्दनकुमार ठाकुरले जानकारी दिनुभयो। 

२०७९ साल पुस २७ गते मुख्यमन्त्रीमा नियुक्त भएका यादवले पहिलो पटक २०७९ साल माघ ४ गते विश्वासको मत लिनुभएको थियो।  तत्पश्चात २०८० साल जेठ १ गते मधेश सरकारमा रहेको नेकपा एमालेले समर्थन फिर्ता लिएपछि उहाँले जेठ ३० गते दोस्रो पटक विश्वासको मत लिनुभएको थियो।  तेस्रो पटक सोही वर्षको फागुन ६ गते विश्वासको मत लिनुभएको थियो। 

त्यसबेला प्रदेशसभाको १ सय सातमध्ये उहाँले ६९ मत प्राप्त गर्नुभएको हो । उहाँलाई जनता समाजवादी पार्टी (जसपा) नेपाल प्रदेश संसदीय दलका नेता समेत रहेका यादवलाई नेपाली कांग्रेस, लोकतान्त्रिक समाजवादी पार्टी (लोसपा) नेपाल, माओवादी केन्द्र, एकीकृत समाजवादी, राष्ट्रिय प्रजातन्त्र पार्टी (राप्रपा), नेपाल संघीय समाजवादी पार्टी र नागरिक उन्मुक्ति पार्टीका प्रदेशसभा सदस्यले समर्थन गरेका थिए। 

त्यसबेला एमाले र यसअघि २ पटक विश्वासको मत दिएको जनमत पार्टी समेत विपक्षमा रहेको थियो। पछि सत्ता साझेदार नेपाली कांग्रेस समर्थन फिर्तासहित सरकारबाट बाहिरिएपछि पुनः २०८१ साल वैशाख ४ गते चौथो पटक विश्वासको मत लिनु भएको थियो। त्यसबेला एमाले, माओवादी केन्द्र, एकीकृत समाजवादी, नेपाल संघीय समाजवादी र नागरिक उन्मुक्ति पार्टीले विश्वासको मत दिएका थिए। 

४ पटक सत्ता गठबन्धनमा फेरबदल आएपछि विश्वासको मत लिनुपरे पनि सरकारको नेतृत्व भने परिवर्तन भएको थिएन। यादवले २ पटक सबैजसो प्रदेशसभा सदस्य र दलको विश्वासको मत प्राप्त गर्नुभयो। तेस्रो पटक नेकपा एमाले र जनमत पार्टी, चौथो पटक कांग्रेस, जनमत र लोसपाको साथ यादवले पाउनुभएन । यसपटक भने मुख्यमन्त्री यादव नेतृत्वको सरकारलाई अहिलेसम्म कांग्रेसले मात्र विश्वासको मत दिने निर्णय गरेको छ। 

यस हिसाबले मुख्यमन्त्री आबद्ध पार्टी जसपाका १९ र कांग्रेसका २२ गरी ४१ सांसद उहाँको पक्षमा देखिएका हुन्। यसअघि विपक्षमा रहेको कांग्रेसले बुधबारै मुख्यमन्त्री यादवलाई विश्वासको मत दिने निर्णय गरेको छ । मधेश प्रदेश सरकारबाट एकीकृत समाजवादी बाहिरिएको छ। मधेश प्रदेश सरकारमा एकीकृत समाजवादीका तर्फबाट भूमि व्यवस्था, कृषि तथा सहकारीमन्त्री गोविन्दबहादुर न्यौपाने र श्रम तथा यातायातमन्त्रीमा बेची लुङ्गेली थिए। लुङ्गेलीले जसपा नेपाल नेतृत्वको सरकारबाट बाहिरिने र सरकारलाई दिएको समर्थन फिर्ता लिने निर्णय भएको जानकारी दिनुभयो।

यहाँ केन्द्रीय सत्ता गठबन्धनमा रहेका दलहरूले जनमत पार्टीको नेतृत्वमा नयाँ सरकार बनाउने तयारी गरेका छन्। एमालेसहित नयाँ गठबन्धनको सरकार बनाउन यहाँ एकीकृत समाजवादीको वा लोसपा मध्ये एक दलको समर्थन अनिवार्य रहेको हो ।