काठमाडौं । सत्तारुढ प्रमुख घटक नेकपा एमालेका अध्यक्ष केपी शर्मा ओलीले नेपाली कांग्रेसले प्रतिशोधपूर्ण राजनीति गरिरहेको आरोप लगाउनुभएको छ ।

डेढ वर्ष प्रधानमन्त्रीको प्रस्ताव गरेको कांग्रेसले आफूले भनेको नमानेपछि उपप्रधानमन्त्री एवं गृहमन्त्री रवि लामिछानेमाथि सहकारी ठगीको आरोप लगाएर प्रतिशोधपूर्ण ढंगले राजनीतिक गरिरहेको उहाँले आरोप लगाउनुभएको हो । शुक्रबार पार्टी संसदीय दलको बैठकमा बोल्दै अध्यक्ष ओलीले गृहमन्त्री लामिछाने सहकारी प्रकरणमा निर्दोष रहेको कुरा महान्यायाधिवक्ताको कार्यालयले समेत स्पष्ट पारेको बताउदै उहाँले यस्ता कुरामा संसदीय छानविन समितिको माग गरेर कांग्रेसले राजीनामा माग्ने खेल शुरु गरेको दावी गर्नुभयो ।

पहिला प्रधानमन्त्रीको प्रस्ताव गरेको कांग्रेसले फेरी लामिछानेमाथि नभएको अभियोग लगाउने प्रयास गरेर छुुद्र राजनीति गरेको उहाँको भनाइ छ । अध्यक्ष ओलीले कसैले उजुरी हालेको भरमा छानविन समिति बनाउने कुरा उचित नभएको र त्यसलाई मान्य पक्षमा आफूहरु नरहेको अडान पनि राख्नुभयो ।