काठमाडौं । गृह मन्त्रालयले पक्राउ परेका व्यक्ति हिरासत छल्न अस्पताल भर्ना हुन नदिने भएको छ।

मन्त्रालयले सोमबार ३ बुँदे निर्देशन जारी गर्दै अनुसन्धान तथा अभियोजनका लागि पक्राउ परेका व्यक्ति हिरासत छल्न अस्पताल भर्ना हुने परिपाटी रोक्न निर्देशन दिएको हो। विभिन्न आरोपमा पक्राउ परेका व्यक्ति पहुँचको भरमा चिकित्सकको सिफारिसका आधारमा हिरासत छल्न अस्पताल भर्ना हुने गरेको चर्चा हुने गरेको छ। सोही अवस्थालाई रोक्नका लागि मन्त्रालयले मन्त्रीस्तरीय निर्णय गरेर मातहतको निकायलाई ३ बुँदे निर्देशन दिएको हो।

प्रहरीको नियन्त्रणमा रहेका व्यक्तिलाई चिकित्सकीय सहायता उपलब्ध गराउने हालको कानूनी व्यवस्था, अभ्यासलाई वस्तुगत, तथ्यपूर्ण र विश्वसनीय बनाउन मन्त्रालयले गत १३ गते नेपाल मेडिकल काउन्सिललाई अध्ययन गरी रायसहितको प्रतिवेदन दिन आग्रह गरेको थियो। सोही अनुसार काउन्सिलले गठन गरेको डा.विश्वराज दवाडीको संयोजकत्वमा ९ सदस्यीय समितिले यहि वैशाख २३ आइतबार बुझाएको प्रतिवेदनका आधारमा गृह मन्त्रालयले ३ बुँदे निर्देशन जारी गरेको हो ।

गृह मन्त्रालयले जारी गरेको ३ बुँदे निर्देशन यस्ता छन्:

१) शारीरिक एवं मानसिक रूपमा अस्वस्थ भएको अवस्था, दीर्घरोगीहरू उच्च रक्तचाप र मधुमेह लगायत नियन्त्रण नभएर अस्पतालमै बसेर उपचार गर्नुपर्ने अवस्थामा अस्पताल लग्नुपर्ने।

२) अस्पताल लग्नुपर्ने विकल्पको रूपमा हिरासतमा नै सरकारी अस्पताल अथवा नेपाल मेडिकल काउन्सिल दर्ता चिकित्सकले परीक्षण गरेर अस्पताल राख्नु पर्नेरनपर्ने सम्बन्धमा निर्णय गर्ने।

३) अस्पतालमा अब्जर भेसनका लागि ४८ घण्टा भन्दा बढी राख्नु परेमा उपयुक्त कारण खुलाउनुपर्ने।