काठमाडौं । लामो रस्साकस्सी पछि अन्तत- सहकारी ठगी प्रकरणमा संसदीय छानविन समिति बनाउन सत्तापक्ष र प्रतिपक्षबीच सहमति भएको छ ।

प्रधानमन्त्री निवास बालुवाटारमा शनिबार साँझ बसेको ४ दलको बैठकमा संसदीय छानविन समिति बनाउने सहमति भएको हो । सोही समितिको टिओआर बनाउन कानूनमन्त्री पदम गिरीको संयोजकत्वमा कार्यदल गठन गर्ने सहमति भएको छ ।

नेपाली कांग्रेसका प्रमुख सचेतक रमेश लेखकले संसदीय छानविन समिति बनाउन सहमति भएको र समितिको कार्यादेश के हुने भन्ने विषयमा छलफल हुने जानकारी दिनुभएको हो । संसदीय समिति बनाएर जाने विषयमा सबै दलको समान धारणा रहेको पनि उहाँको भनाइ छ । टिओआर बनाउन आइतबार बिहानदेखि काम गर्ने कुरा भएको उहाँले बताउनुभयो ।

सोही बैठकमा प्रधानमन्त्री पुष्पकमल दाहाल, नेकपा एमालेका अध्यक्ष केपी शर्मा ओली, गृहमन्त्री एवं राष्ट्रिय स्वतन्त्र पार्टीका सभापति रवि लामिछाने, कांग्रेसका सभापति शेरबहादुर देउवासहित महामन्त्री गगन थापा, राष्ट्रियसभा संसदीय दलका नेता कृष्णप्रसाद सिटौला र प्रमुख सचेतक रमेश लेखक सहभागी भएका थिए ।