रूपन्देही ‘ए’ डिभिजन लिग आजदेखि शुरू, सुनौलो र हिमालबीच प्रतिस्पर्धा हुँदै
काठमाडौं । रुपन्देही ‘ए’ डिभिजन लिग शनिबारदेखि शुरु हुने भएको छ ।
बुटवलमा शनिबार दिउँसो साढे ३ बजे लिगको उद्घाटन हुने भएको हो । बुटवल उपमहानगरपालिका–११ स्थित एन्फा खेल मैदानमा शनिबार हुने उद्घाटन खेलमा साविक विजेता सुनौलो संगम र हिमाल युथ क्लबबीच प्रतिस्पर्धा हुने भएको छ ।
रुपन्देही जिल्ला फुटवल संघको आयोजनामा हुने प्रतियोगितामा ९ टिमको सहभागिता रहने भएको हो । टिममा ‘ए’ डिभिजनका ७ तथा बी डिभिजन लिगबाट छनोट भएर बढुवा भएका २ वटा क्बल गरी ९ टिम रहने भएका छन् ।
जसमा यस वर्ष समूह ‘ए’मा बढुवा भएका हिमाल युथ क्लब र सिम्रिक युथ क्लबसँगै साविक विजेता सुनौलो संगम युवा क्लब, गोर्खा ब्वाईज, बुटवल युनाइटेड, सौभाग्य युवा क्लब, फर्साटिकर युवा क्लब, लिस्नु युवा क्लब र डिएमसी रहेका हुन् ।
राउण्ड रोबिनका आधारमा हुने प्रतियोगितामा जम्मा ३६ खेल हुने भएका छन् । प्रतियोगिताको विजेता १ लाख, दोस्रोले ५० हजार, तेस्रोले ३० हजार र चौथो टोलीले २० हजार रुपैयाँ प्राप्त गर्ने भएका हुन् ।
