एजेन्सी । भारतको दक्षिण–पश्चिमी राज्य महाराष्ट्रको रासायनिक कारखानामा बिहीबार भएको विस्फोटमा परी मृत्यु हुनेको संख्या ११ जना पुगेको स्थानीय अग्निनियन्त्रण विभागका अधिकारीले पुष्टि गरेका छन् ।

बिहीबार भएको विस्फोटका कारण मृत्यु भएका थप ४ जनालाई शुक्रबार घटनास्थलबाट बाहिर ल्याइएको र योसँगै विस्फोटमा परी मृत्यु हुनेको संख्या ११ पुगेको अग्नि नियन्त्रक विभागका अधिकारीले उल्लेख गरेका हुन् । अधिकारीका अनुसार उक्त घटनामा परी घाइते हुने व्यक्तिको संख्या ६० भन्दा बढी पुगेको छ । 

मुम्बईको नजिकै रहेको ठाणे जिल्लाको डोम्बिवली क्षेत्रमा अवस्थित रासायनिक कारखानामा रहेको एउटा बाष्प इन्जिन ठूलो आवाजसहित विस्फोट भएको थियो । विस्फोटपछि कारखानाका अन्य भागमा आगो तुरुन्तै फैलिंदा अन्य विस्फोटहरू भएका थिए । विष्फोटको आवाज १.५ किलोमिटर टाढाबाट सुनिएको बताइएको छ ।

सोही घटनाका घाइतेहरूलाई स्थानीय अस्पतालमा भर्ना गरिएको हो । जसमध्ये केहीलाई प्राथमिक उपचारपछि घर पठाइएको छ ।