काठमाडौं । राष्ट्रपति रामचन्द्र पौडेलले मुलुकभित्र मर्यादित श्रम गर्ने वातावरण निर्माण गरी आन्तरिक उत्पादकत्व बढाउनुपर्ने बताउनुभएको छ ।

१३५ औं विश्व मजदुर दिवसको अवरसमा बुधबार एक शुभकामना सन्देश जारी गर्दै उहाँले मुलुकको आर्थिक समृद्धि र आत्मनिर्भरउन्मुख अर्थतन्त्र निर्माणका लागि आन्तरिक श्रम बजार मजबुत हुनुपर्नेमा जोड दिनुभएको हो ।

उद्यमशीलताको विकास गर्न पूँजी लगानी गर्ने उद्यमी र श्रम तथा सीप लगानी गर्ने श्रमिक दुवैको योगदान उत्तिकै महत्वपूर्ण हुने भएकाले मर्यादित श्रमको वातावरण निर्माण गरी उत्पादकत्व वृद्धि गर्नुपर्ने उहाँको भनाइ छ । श्रमको सम्मान, स्वरोजगार, उचित पारिश्रमिक एवं सामाजिक सुरक्षालगायतका श्रमिक अधिकारलाई सुनिश्चित गर्नेतर्फ अग्रसर हुन प्रेरणा मिल्ने विश्वास पनि उहाँले व्यक्त गर्नुभयो ।

त्यस्तै, प्रधानमन्त्री पुष्पकमल दाहालले पनि श्रमको सम्मानसहित समृद्धिको जग बसाल्न सरकार गम्भीरताका साथ लागिरहेको बताउनुभएको छ । उहाँले विश्व मजदुर दिवसको अवरसमा बुधबार एक शुभकामना सन्देश जारी गर्दै उहाँले यस्तो बताउनुभयो ।

श्रमिकको हित, रक्षालाई केन्द्रमा राखेर विदेशमा रहेका नेपाली, सरकारी, अर्धसरकारी र सामाजिक क्षेत्रमा क्रियाशील श्रमिकका निम्ति योगदानमा आधारित सामाजिक सुरक्षा कार्यक्रम सञ्चालन गरिएको उहाँले बताउनुभएको हो ।

श्रमिकलाई उचित श्रम अभ्यासको हकसहित आफ्नो हितरक्षाका निमित्त ट्रेड युनियन खोल्ने- संगठित हुने लगायतका हकलाई प्रत्याभूत गरिएको उहाँले प्रष्ट पार्नुभयो । श्रमजीवी वर्गको हकहित, अधिकारको सुनिश्चितता नभएसम्म समानता, स्वाभिमान, सामाजिक न्याय र समृद्धि सम्भव नहुने प्रधानमन्त्री दाहालको भनाइ छ ।

राजनीतिक दलका अन्य शीर्ष नेताहरुले पनि सोही दिवसको अवसरमा आफ्ना विचार राखेका हुन् ।