काठमाडौं । उपप्रधान एवं स्वास्थ्य तथा जनसंख्यामन्त्री उपेन्द्र यादवले देश छाड्दा सग्लो रहेको जनता समाजवादी पार्टी नेपाल (जसपा) फर्किँदासम्म २ टुक्रा भइसकेको छ ।

मन्त्री यादव मंगलबार बिहान १ बजे कतार एयरवेजको विमानबाट काठमाडौं उत्रिंदा स्वास्थ्य मन्त्रालयका केही कर्मचारी र जसपा कार्यकर्ताले खादा र मालाले स्वागत गरेका हुन् । तर यादवको अनुहारमा खुशी देखिएको थियो ।मन्त्री यादव अमेरिकबाट काठमाडौं आइनपुग्दै जसपा विभाजन गरेर संघीय परिषद अध्यक्ष अशोक राईले नयाँ दल खोलिसक्नुभएको छ । जसपाका १२ मध्ये ७ जना सांसद राईले लगिसक्नुभएको हो ।

गत अप्रिल ३० देखि मे ३ तारिखसम्म यूएन सेक्रेटरियट न्यूयोर्कमा भएको विश्व जनसंख्या सम्बन्धी सम्मेलनमा नेपालको प्रतिनिधित्व गर्दै गत शनिबार बेलुकी मन्त्री यादव अमेरिका जानु भएको थियो । तर एक सातामा नेपाल फर्किँदा उहाँले पार्टी विभाजनको नराम्रो चोट सहनु परेको हो । नेपाल टेक्न नपाउँदै मन्त्री यादवको दल जसपा नेपाल अब प्रतिनिधिसभामा १२ सिटबाट घटेर ५ मा सीमित भएको छ ।

उहाँले अमेरिकाबाट कतार हुँदै काठमाडौं टेकिनसक्दा राईले जनता समाजवादी पार्टी (जनता समाजवादी) लाई निर्वाचन आयोगमा दर्ता गरेर प्रमाणपत्र समेत लिइसक्नुभएको हो । पूर्वशिक्षामन्त्री समेत रहेका राईले नयाँ दल दर्ता गर्दा केन्द्रीय कमिटीबाट पनि ३० जना नेतालाई आफ्नो पक्षमा पारिसक्नुभएको छ ।

राई नेतृत्वको पार्टीलाई औपचारिक रुपमा दलको मान्यता मिलेको छ । अर्थात मन्त्री यादवले पार्टी विभाजन रोक्ने मौका समेत पाउनुभएन ।राई नेतृत्वको नयाँ पार्टीमा प्रदीप यादव, रञ्जु ठाकुर, बहालवाला मन्त्री नवलकिशोर साह सुडी, वीरेन्द्र महतो, सुशीला श्रेष्ठ, हसिना खातुन जोडिएका छन् ।

अध्यक्ष यादव नेपाल आउनुअघि नै जसपा नेपाल संसदीय दलको बैठक मंगलबार बिहान पार्टी कार्यलय बालकुमारीमा बोलाइएको हो । जसका ५ जना मात्रै सांसद बाँकी रहेका छन् । उहाँले संघीय संसदका दुवै सदनमा प्रतिनिधित्व गर्ने सांसदहरूलाई बैठकमा सहभागी हुन आफ्नो सचिवालय मार्फत खबर गरिसक्नुभएको हो ।

मन्त्री यादवका स्वकीय सचिव महेश चौरसियाले जसपा नेपाल संसदीय दलको बैठक बसेर मात्रै विस्तृत धारणा सार्वजनिक गरिने बताउनुभयो ।