काठमाडौं । प्रधानमन्त्री पुष्पकमल दाहालले प्रमुख प्रतिपक्षी नेपाली कांग्रेसको अहिलेको क्रियाकलापको नतिजा आगामी चुनावमा देखिने बताउनुभएको छ ।

आफ्नो तेस्रो कार्यकालको १६ महिनाभित्र सोमबार चौथो पटक प्रतिनिधि सभामा विश्वासको मत लिएपछि संसद भवन परिसरमा संचारकर्मीसँग कुरा गर्दै उहाँले यस्तो बताउनुभएको हो । पटक-पटक विश्वासको मत लिने अवस्थाको बारेमा प्रधानमन्त्री दाहालले नेपालमा मात्रै नभइ विश्वमा पनि यस्तो घटनाक्रम रहेको बताउनुभएको छ ।

विश्वका कयौं देशमा पटक-पटक विश्वासको मत लिनुपर्ने घटना भएको बताउदै उहाँले जरुरी परेमा अझै १०–१२ पटक विश्वासको मत लिने दावी समेत गर्नुभयो । सोमबार चौथौ पटक पनि उहाँले विश्वासको मत प्राप्त गर्नुभएको छ ।

प्रधानमन्त्री दाहालले १ सय ५७ मतसहित आफू नेतृत्वको सरकारको सुरक्षा गर्न सफल हुनुभएको हो ।