काठमाडौं । सभामुख देवराज घिमिरेले बोलाएको प्रमुख राजनीतिक दलका प्रमुख सचेतक र सचेतकहरूबीचको बैठक निष्कर्ष विहीन भएको छ ।

सिंहदरबारस्थित सभामुखको कार्यकक्षमा आइतबार बसेको बैठकमा कानून, न्याय तथा संसदीय मामिला मन्त्री, दलका प्रमुख सचेतक र सचेतकहरूको बैठक बसेको हो । सभामुख घिमिरेले नीति तथा कार्यक्रमको तयारी लगायतका विषयमा छलफल गर्न बैठक बोलाउनुभएको थियो।

आगामी जेठ १ गते सरकारको नीति तथा कार्यक्रम संसदको संयुक्त बैठकमा राष्ट्रपति रामचन्द्र पौडेलले प्रस्तुत गर्नुहुने भएको छ । बैठकमा प्रमुख प्रतिपक्षी दल नेपाली कांग्रेसले आफ्नो अडान कायम राखेको हो । कांग्रेसका प्रमुख सचेतक रमेश लेखकले संसदीय छानबिन समिति बनाएर संसदको अवरोध हटाउन सरकारले अग्रसरता लिनुपर्ने धारणा राख्नुभएको हो ।

छानबिन समिति गठनको निर्णयबाट कांग्रेस पछि नहट्ने र समिति गठन नभई अन्य कार्यसूचीमा सदन अगाडि बढ्न नदिने उहाँको भनाइ छ । त्यस्तै, बैठकमा नेकपा एमाले र नेकपा माओवादी केन्द्रसहितका सत्ता घटकले संसदीय छानबिन समिति गठन नगर्ने बताएका हुन्

कांग्रेसले उपप्रधान एवं गृहमन्त्री रवि लामिछाने सहकारी ठगी प्रकरणमा मुछिएको भन्दै लामो समयदेखि संसदीय छानबिन समिति गठनको माग गर्दै संसद अवरोध गर्दै आएको छ ।