निर्वाचन आयोगले इलाम-२ मा यहि वैशाख १५ गते हुने उपनिर्वाचनका लागि प्रचारप्रसारको आज (बुधबार) अन्तिम दिन भएको जनाएको छ ।
काठमाडौं । निर्वाचन आयोगले इलाम-२ मा यहि वैशाख १५ गते हुने उपनिर्वाचनका लागि प्रचारप्रसारको आज (बुधबार) अन्तिम दिन भएको जनाएको छ ।
बुधबार मध्यराति १२ बजेदेखि मौन अवधि शुरु हुने भएकाले दलहरूले विभिन्न ठाउँमा चुनावी सभा गरेर आफ्नो प्रचारप्रसार अभियानको अन्त्य गर्ने भएका हुन्। नेपाली कांग्रेसले बुधबार माङसेवुङ र देउमाईसहित निर्वाचन हुने ६ स्थानीय तहका ४२ वटै वडामा घरदैलो र मतदाता भेटघाटको कार्यक्रम गरिरहेको छ। नेकपा एमालेले पनि चुलाचुलीमा अध्यक्ष केपी शर्मा ओलीको उपस्थितिमा चुनावी सभा गरिरहेको हो ।
त्यसैगरी राष्ट्रिय स्वतन्त्र पार्टीले देउमाई नगरपालिका केन्द्र मङगलबारे र इलाम गरी २ ठाउँमा सभा गरिरहेको छ । चुनावी प्रचारमा उपप्रधान एवं गृहमन्त्री समेत रहनुभएका पार्टी सभापति रवि लामिछाने केही दिनदेखि इलामा नै बस्नुभएको छ । बुधबारका सभामा उहाँले सम्बोधन गर्नु हुने भएको हो । साथै पहिचान पक्षधर उम्मेदवार डकेन्द्रसिंह थेगिमको पनि चुलाचुलीमै आमसभा रहेको छ ।
इलाम–२ मा ठूलासाना दल र स्वतन्त्रबाट १९ जनाको उम्मेदवार रहेका हुन् । जसमा एमालेका सुहाङ नेम्बाङ, कांग्रेसका डम्बरबहादुर खड्का, राष्ट्रिय स्वतन्त्र पार्टीका मिलन लिम्बु र स्वतन्त्र उम्मेदवार डकेन्द्रसिंह लिम्बु थेगिमबीच नै चुनावी प्रतिष्पर्धा रहेको देखिएको छ ।
यस बाहेक सोही क्षेत्रमा नेकपा एकीकृत समाजवादीका जितबहादुर राई, राष्ट्रिय प्रजातन्त्र पार्टीका लक्ष्मी गुरुङ, जनमत पार्टीका प्रेमकुमार थाम्सुहाङ, नेपाल मजदुर किसान पार्टीका श्यामबहादुर दर्जी, मंगोल नेशनल अर्गनाइजेशनका मीनबहादुर लिम्बु, नेशनल रिपब्लिक नेपालका धनराज राना मगर, राष्ट्रिय मुक्ति आन्दोलन नेपालका जयन्त्रविक्रम शाह, राष्ट्रिय प्रजातन्त्र पार्टीका गणेशबहादुर चौहान र नेपाली जनता दलका रेशमबहादुर सुनार नेपाली चुनावी मैदानमा हुन्।
त्यस्तै, स्वतन्त्र उम्मेदवारहरू डाकप्रसाद गौतम, मनोज निरौला, अर्जुनकुमार शाही, दीपेश बोहोरा, योगेन्द्र गुरुङ र राज बस्याल पनि चुनावी मैदानमा रहेका छन् । सोही क्षेत्रमा चुलाचुली गाउँपालिका, माङसेबुङ गाउँपालिका, फाकफोकथुम गाउँपालिका पूरै तथा इलाम नगरपालिका (१० वडा बाहेक), देउमाई नगरपालिका, माई नगरपालिकाका ६, ७ र ८ वडा गरी ४२ वटा वडा समेटिएका हुन् ।
उम्मेदवारहरूले गत चैत २८ देखि यहि वैशाख १२ गते आज (बुधबार) सम्म मात्र चुनावी प्रचारप्रसार गर्न पाउने भएका छन् । सोही क्षेत्रमा १ लाख १५ हजार ३ सय ४२ जना मतदाताले वैशाख १५ गते मतदान गर्न पाउने आयोगले जनाएको हो ।
