काठमाडौं । बझाङ-१ को प्रदेशसभा सदस्य चयनका लागि शनिबार सम्पन्न भएको उपनिर्वाचनको मतगणना सोमबार पनि जारी रहेको छ ।

बझाङमा नेपाली कांग्रेसले सोमबार बिहानदेखि अग्रता लिएको हो । पछिल्लो मत परिणाममा नेकपा एमालेले मत-अन्तर घटाउँदै लगेको छ। अघिल्लो पटक सार्वजनिक भएको मत परिणाममा २ सय ८४ मतले अगाडि रहेको कांग्रेस पछिल्लो मत परिणाममा ८३ मतले मात्र अगाडि रहेको हो ।

पछिल्लो मतपरिणाम अनुसार कांग्रेसका उम्मेदवार अविषेक सिंहले ९ हजार १ सय ६७ मत प्राप्त गर्नुभएको छ । एमालेका उम्मदेवार दमन भण्डारीले ९ हजार ८४ मत प्राप्त गर्नुभएको हो । कडा प्रतिस्पर्धा देखिएको बझाङमा कांग्रेस एमाले भन्दा ८३ मतले मात्र अगाडि रहेको छ।

नेकपा माओवादी केन्द्रका उम्मेदवार जनक बुढा ३ हजार ४ सय ९५ मतसहित तेस्रो र नेकपा एकीकृत समाजवादीका उम्मेदवार दिलबहादुर सिंह २ हजार ३ सय २८ मतसहित चौथो स्थानमा रहेका हुन्।

मष्टा गाउँपालिका सकेर अहिले तल्कोटको मतगणना जारी रहेको छ। बझाङमा अब साइपाल गाउँपालिकाको मतगणना हुन बाँकी रहेको हो।