आगामी असोज ८ र ९ गते नेकपा एमाले बागमती प्रदेशको अधिवेशन हुँदै छ । उक्त अधिवेशनको तयारी तीव्र पारिएको छ भने नेतृत्व हत्याउने दौडमा आकाङ्क्षीहरू सक्रिय बनिरहेका छन् ।

काठमाडौँको भृकुटी मण्डपमा हुने एमालेको प्रथम प्रदेश अधिवेशनबाट एमाले बागमती प्रदेशको नयाँ कमिटी निर्माण हुनेछ । एमाले बागमती प्रदेशका उपसचिव एवम् नेकपा एमाले संसदीय दलका सचेतक महेश बर्तौलाका अनुसार सर्व सहमतिबाट नेतृत्व चयन हुने सम्भावना बलियो रहेको छ ।

अधिवेशनबाट १ अध्यक्ष, एक उपाध्यक्ष, एक सचिव र २ उपसचिवसहित २४० सदस्यीय कमिटी चयन गर्ने उनले बताए । उक्त कमिटीमा ३३ प्रतिशत महिलाको सहभागिता हुनेछ भने १० प्रतिशत ४० वर्ष भन्दा कम उमेर समूहका व्यक्ति रहने उनको भनाई छ । जनजाति, पिछडिएको वर्ग, दलितहरूको सहभागितामा कमिटीलाई समावेशी बनाइने उनले बताए ।

यसअघि एमालेले प्रदेश कमिटी ४४७ सदस्यीय रहेकोमा यसपटक भने ५ जना पदाधिकारीसहित २४० सदस्यीय कमिटी कायम गरिएको उनले बताए ।