एलिजावेथ द्वितीयको निधनले बेलायत अझै शोकमै छ । तर यही बेला बेलायती राजतन्त्रको अधीनमा रहेका कतिपय देशहरुले भने त्यो अधीनबाट छुट्टी लिन खोजेका छन् ।

टाइम म्यागजिनका अनुसार क्यानडा, न्युजिल्यान्ड, अष्ट्रेलिया, बेलिज, जमाइका, टुभालु, पपुवा न्युगिनी, सोलोमन आइल्यान्डमा बेलायती राजतन्त्रबाट मुक्त हुनुपर्ने माग उठिरहेको हो । नयाँ राजा चार्ल्स तृतीयको आगमनले यो बहसलाई अझै सघन बनाउने निश्चित छ ।

अष्ट्रेलियाको ग्रीन पार्टीका आदम ब्रान्ड्टले रानीको निधनमा दुःख प्रकट गर्दै अब आफ्नो देशलाई नयाँ परिस्थितिको लागि तयार हुन र अगाडिको बाटोबारे निर्णय लिन प्रेरणा मिल्ने बताए ।

न्युजिल्यान्डकी इतिहास प्रोफेसर केटी पिकल्सले आफ्नो समाजको नयाँ पुस्ताका लागि राजतन्त्र अनावश्यक र महत्वहीन बन्दै गरेको यथार्थ बुझ्नुपर्ने बताइन् । ‘एलिजावेथसँग जुन अपिल र आकर्षण थियो, सायद अहिलेका राजारानीमा त्यो नहोला,’ उनले भनिन् ।माथि उल्लेखित देशका नागरिकहरुले अब बेलायती राजतन्त्रलाई कसले नेतृत्व गर्दैछ भन्ने कुरालाई महत्व दिनुसाटो भविष्यको योजना बुन्ने गतिविधि गर्नुपर्ने मत बलियो बनाउँदै लगेका छन् । यस्तै क्यारेबियाली देशहरुमा पनि राजतन्त्रविरोधी भावना बढ्दै गएको टाइम म्यागजिनले भर्खरै लेखेको छ । धेरैले लेखेका छन्, ‘मृत्युले दुःख मात्रै ल्याउँदैन, बहस र तर्कहरु पनि ल्याउँछ ।’