कोरोना संक्रमितको संख्या दैनिक बढ्न थालेपछि टर्कीमा रात्रिकालीन कर्फ्युको घोषणा गरिएको छ ।

टर्कीका राष्ट्रपति रेसेप तायिप इर्दोगानले राति ९ बजेदेखि बिहान ५ बजेसम्म कर्फ्यु लगाउने घोषणा सोमबारको मन्त्रिपरिषद् बैठकमा गरेका हुन् । यसका साथै शुक्रबार साँझ ९ बजदेखि सोमबार बिहान ५ बजेसम्म लकडाउनको घोषणा पनि गरिएको छ। यस अवधिमा ग्रोसरी स्टोर र खाद्यान्नका सेवा भने निश्चित समयका लागि खुला हुन दिइने बताइएको छ ।

यस्तै ६५ वर्षभन्दा बढी उमेरका र २० वर्षभन्दा कम उमेरका नागरिकलाई सार्वजनिक यातायात प्रयोग गर्न अनुमति दिइएको छैन । विवाह र अन्त्येष्टि संस्कारमा ३० जनाभन्दा बढी भेला हुन पाइनेछैन भने नयाँ वर्षको समारोह रद्ध गरिएको छ ।

पछिल्लो २४ घण्टामा टर्कीमा थप ३० हजार ११० नयाँ संक्रमित थपिएका छन् । यस्तै १९० जनाको उक्त अवधिका कोरोनाका कारण मृत्यु भएको छ । हालसम्म संक्रमितको संख्या ६ लाख ६८ हजार ९५७ पुगेको छ भने १३ हजार ९३६ जनाको मृत्यु भइसकेको छ । यस्तै ४ लाख ९ हजार ३२० संक्रमित निको भएका छन् ।