नेपालमा कोरोनाभाइरसबाट मृत्यु हुनेको औपचारिक कुल सङ्ख्या १,७९८ पुगेको स्वास्थ्य तथा जनसङ्ख्या मन्त्रालयको तथ्याङ्कले देखाएको छ।

तर शव व्यवस्थापन गर्दै आएको नेपाली सेनाले भने पुष ६ गतेसम्ममा कोभिड-१९ सँग सम्बन्धित २,७४७ वटा शव व्यवस्थापन गरिसकेको जनाएको छ।

त्यसको अर्थ स्वास्थ्य मन्त्रालय र नेपाली सेनाको तथ्याङ्कमा ९४९ जनाको सङ्ख्या फरक परेको छ।

नेपाली सेनाका प्रवक्ता सन्तोषवल्लभ पौडेलका अनुसार नेपाली सेनाले कोभिड-१९ सम्बन्धी शव व्यवस्थापन कार्यविधिमा कोभिड - १९ को प्रमाणपत्र र अस्पताल वा स्वास्थ्य निकायले दिने मृत्यु भएको प्रमाणपत्र भएपछि जिल्लास्थित सीसीएमसीको अनुरोधमा शव व्यवस्थापन गर्दै आएको छ।