उत्तरी आयरल्यान्डकी ९० वर्षीया महिला विश्वमै कोरोना खोप लगाउने 'पहिलो' व्यक्ति
(लन्डन) बेलायतमा मंगलबारदेखि आममानिसमा कोभिड–१९ विरुद्धको खोप अभियान सुरु भएको छ । अमेरिकी कम्पनी फाइजर र यसको जर्मन साझेदार बायोएनटेकले संयुक्त रुपमा विकास गरेको खोप पहिलो चरणमा बेलायतभरका ५० अस्पतालबाट दिन सुरु गरिएको हो ।
बीबीसीका अनुसार उत्तरी आयरल्यान्डकी ९० वर्षीया महिलालाई पहिलो कोरोना खोप दिइएको हो । कोभेन्ट्रीमा रहेको युनिभर्सिटी हस्पिटलमा ९० वर्षीया मार्गरेट कीनेनलाई पहिलो पटक कोरोना खोप दिइएको हो । कीनेनले कोरोना खोप लिन पाउँदा आफू भाग्यमानी महसुस भएको उनले बताएकी छन्।
स्कटल्यान्ड, वेल्स र नर्दर्न आयरल्यान्डले पनि मंगलबारदेखि खोप वितरण सुरु गरेका छन् । बेलायतमा पहिलो चरणमा आउँदो सातासम्म ८ लाख डोज भ्याक्सिन दिइने छ । खोप लगाएका प्रत्येक मानिसलाई खोप कार्ड उपलब्ध गराइने भएको छ । स्वास्थमन्त्री म्याट हेनककले ट्वीट गर्दै सबै क्षेत्रमा खोप पुगिसकेको जनाएका छन् ।
अग्रपंक्तिमा काम गर्ने स्वास्थ्य कर्मचारी, ८० वर्ष नाघेका वृद्धवृद्धा र केयर होमका कामदार खोपको पहिलो प्राथमिकतामा छन् । राष्ट्रिय स्वास्थ्य सेवा, इंग्ल्यान्डका मेडिकल डाइरेक्टर प्रोफेसर स्टेफेन पोविसले यो बेलायतकै इतिहासमा जटिल र बृहत् खोप अभियान भएको बताएका छन् ।
एनएचएस इंग्ल्याण्डका प्रमुख कार्यकारी सर साइमन स्टेभेन्सले खोप अभियान कोरोना भाइरसविरुद्धको लडाईंमा निर्णायक मोड भएको प्रतिक्रिया दिंदै आगामी वसन्त ऋतुसम्म खोप कार्यक्रम जारी रहने र यो बेला मानिसलाई धेरै होसियार रहन सुझाएका छन् ।
फाइजर र बायोएनटेकले विकास गरेको उक्त खोप बेल्जियमबाट बेलायतसम्म ढुवानीका लागि बेलायती सेनाको सहयोगसमेत लिने सरकारको योजना छ । विदेशमन्त्री जेम्स क्लेभर्लीले सो जानकारी दिएका हुन् ।
परीक्षणका क्रममा ९५ प्रतिशतसम्म प्रभावकारी देखिएको यो खोप बेलायतले २ करोड मानिसलाई पुग्ने गरी ४ करोड डोज अर्डर गरेको छ । २१ दिनको अन्तरमा दुई डोज दिइनेछ ।
क्रोयडन युनिभर्सिटी हस्पिटलका क्लिनिकल अडिट विभाग प्रमुख डा. सुरजमणि पौडेलले आफ्नो अस्पतालमा बिहान ७ बजेदेखि खोप लगाउन सुरु भएको जानकारी दिए । फाइजर, बायोएनटेक खोप प्राप्त गर्ने उक्त अस्पताल विश्वकै पहिलो हो । ती खोपका कन्टेनर स्पेसल फ्रिजरमा राखिएको छ ।
‘सुरुमा हस्पिटलको बहिरंग विभागमा अपोइन्टमेन्ट भएका ८० वर्ष माथिका, हस्पिटलबाट डिस्चार्ज भएर केयर होममा जाने ८० वर्ष माथिका, फ्रन्टलाइन स्वास्थ्यकर्मी (बढी जोखिममा रहेका) र केयर होममा काम गर्नेलाई खोपको प्राथमिकता निर्धारण गरिएको छ’, पौडेलले कान्तिपुरसँग भने, ‘हाम्रो अस्पतालमा ठूलो टिम क्रिसमस र नयाँ वर्षमा समेत नरोकिइ खोप अभियानमा जुटेको छ । कर्मचारीहरु निकै उत्साहित छन् ।’
क्रोयडन नेपाली समाजका अध्यक्ष पौडेल आफ्ना करिब ७० प्रतिशत सदस्य फ्रन्टलाइन हेल्थ वर्कर भएकाले नेपाली समुदाय पनि यसबाट लाभान्वित हुने बताउँछन् ।
