कोरोना भाइरस सङ्क्रमणका कारण इन्डोनेसियामा पूर्वनिर्धारित निर्वाचन पछाडी धकेलिएको छ। सेप्टेम्बर २३ का लागि निर्धारण गरिएको निर्वाचन सर्ने भएको हो।

राष्ट्रपति जोको विडोडोले सोमबार निर्वाचन सरेको घोषणा गरेका हुन्। उनले सेप्टेम्बरका लागि भएको निर्वाचन अब डिसेम्बरमा हुने बताएका छन्।

नयाँ घोषित मितिमा पनि निर्वाचन हुन्छ वा हुन्न भन्ने कुरा कोरोना भाइरसको महामारीमा भर पर्ने उनको भनाइ छ। राज्य सचिवालयको आधिकारिक अनुसार निर्वाचनले नौ जना गर्भनर, ३७ जना मेयर सहित २ सय २४ जना जिल्ला प्रमुख गरी २ सय ७० जना जनप्रतिनिधि छनौट गर्नेछ।

इन्डोनेसियामा कोरोना भाइरसबाट हालसम्म १२ हजार ४३८ जना सङ्क्रमित भएका छन्। ती मध्ये ३ सय ६७ जना पछिल्लो २४ घण्टामा सङ्क्रमित भएका हुन्।

त्यसैगरी कुल मृतकको संख्या ८ सय ९५ पुगेको छ।

त्यहाँ पछिल्लो २४ घण्टामा २३ जनाको मृत्यु भएको अधिकारीहरुले जनाएका छन्।