(धरान) धरानका एक युवकले टाउकोमा ढुंगाले प्रहार गरेर श्रीमतीको हत्या गरेका छन् । श्रीमतीको हत्यापछि फरार भएका उनलाई प्रहरीले घटना भएको ४ घण्टापछि पक्राउ गरेको छ ।

धरान नगरपालिका वडा नम्बर १५ निवासी अञ्दाजी २३ वर्षीय युवक अर्जुन राईले बुधबार राति आफ्नी श्रीमतीको टाउकोमा ढुंगा प्रहार गरेर हत्या गरेका हुन् ।

धरान-१५ खोरिया बस्ती नजिकै सेउती खोलाको डीलमा लगेर उनले श्रीमतीको हत्या गरेको प्रहरीले जनाएको छ ।

प्रहरीले घटनास्थलबाट मृतक २० वर्षीया जीना तामाङको शव बरामद गरेको छ । श्रीमतीको हत्या गरी फरार भएका राईलाई सेउती खोलाको पुल नजिकैबाट राति साढे ११ बजेतिर पक्राउ परेका छन् ।

सामान्य ज्याला मजदुरी गरी खाने अर्जुन र जीनाको ५ वर्षअघि किशोरावस्थामै प्रेम विवाह भएको थियो । साथमा ४ वर्षकी छोरी छिन् । पछिल्लो समयमा अर्जुन बेरोजगार थिए । श्रीमान-श्रीमतीबीच झगडा भइरहने गरेकाले जीना प्रायः सेउतीखोला पारि पानवारीमा रहेको माइतीघरमै बस्दै आएकी थिइन् । श्रीमानले मोवाइलमा कसैको फोन आउँदा पनि अनेकथरी शंका गरेर गाली गर्ने गरेको जीनाले निकटस्थहरुलाई बताउने गरेकी थिइन् ।