उत्तर कोरियाले क्षेप्यास्त्र, तोपखाना र ड्रोनसहित संयुक्त प्रत्यक्ष गोलीबारी अभ्यास गर्दै आफ्नो ‘विशाल विनाशकारी शक्ति’ प्रदर्शन गरेको दाबी गरेको छ।

उत्तर कोरियाको सरकारी सञ्चारमाध्यम कोरियन सेन्ट्रल न्युज एजेन्सी (केसीएनए) का अनुसार शनिबार गरिएको अभ्यास एकीकृत हतियार नियन्त्रण प्रणालीको क्षमता परीक्षणमा केन्द्रित थियो। दक्षिण कोरियाली सेनाका अनुसार सोही दिन उत्तर कोरियाले वोनसन क्षेत्रबाट छोटो दूरीको ब्यालेस्टिक क्षेप्यास्त्र प्रक्षेपण गरेको थियो, जुन पूर्वी समुद्रतर्फ करिब २५० किलोमिटर उडेको थियो।

अभ्यासको निरीक्षणपछि उत्तर कोरियाली मार्सल पाक जोङ चोनले एकीकृत हतियार प्रणालीले ठूलो स्तरमा समन्वयात्मक रूपमा प्रहार गर्न सक्ने क्षमता प्रदर्शन गरेको बताएका छन्। यद्यपि, उत्तर कोरियाले गर्ने हतियार परीक्षणसम्बन्धी दाबी स्वतन्त्र रूपमा पुष्टि गर्न कठिन हुने गरेको छ।

अमेरिका, दक्षिण कोरिया र जापानको संयुक्त सैन्य अभ्यास सकिएको एक दिनपछि उत्तर कोरियाले उक्त अभ्यास गरेको हो। गत अगस्टमा अमेरिकी राष्ट्रपति डोनाल्ड ट्रम्पले उत्तर कोरियाली नेता किम जोङ उनसँग सम्बन्ध सुधार गर्ने प्रयासस्वरूप दक्षिण कोरियासँगको प्रमुख सैन्य अभ्यास उल्लेख्य रूपमा घटाउन निर्देशन दिएका थिए।

तर, उत्तर कोरियाले अभ्यासको अवधि घटाउँदैमा त्यसको ‘उत्तेजक र आक्रामक प्रकृति’ नबदलिने भन्दै उक्त प्रस्ताव अस्वीकार गरेको थियो।

विज्ञहरूका अनुसार उत्तर कोरियाको बढ्दो आणविक हतियार भण्डार तथा रूस र चीनसँग गहिरिँदो सम्बन्धले किमलाई अमेरिकासँग सम्भावित वार्तामा विगतको तुलनामा बलियो बनाएको छ। किमले अमेरिकाले उत्तर कोरियाप्रतिको ‘शत्रुतापूर्ण नीति’ त्यागेर आफ्नो देशको आणविक राष्ट्रको हैसियत सम्मान गरे वार्तामा फर्कन सकिने बताएका छन्।