रियाद — साउदी अरेबियाका युवराज तथा प्रधानमन्त्री **मोहम्मद बिन सलमान (एमबीएस)**ले इरानमाथि प्रस्तावित सैन्य आक्रमण नगर्न अमेरिकी राष्ट्रपति डोनाल्ड ट्रम्पलाई आग्रह गरेका छन्।

अन्तर्राष्ट्रिय सञ्चारमाध्यमका अनुसार ट्रम्पसँगको टेलिफोन वार्तामा युवराज सलमानले मध्यपूर्वको तनाव कूटनीतिक संवादमार्फत समाधान गर्नुपर्नेमा जोड दिएका हुन्।

अमेरिकी अधिकारीहरूलाई उद्धृत गर्दै प्रकाशित समाचारअनुसार ट्रम्प प्रशासनले इरानले जोर्डनस्थित अमेरिकी सैन्य अड्डामा क्षेप्यास्त्र प्रहार गरेको र होर्मुज जलडमरूमध्यमा जहाज आवागमन अवरुद्ध गरेको आरोप लगाउँदै इरानका ऊर्जा पूर्वाधारमाथि सैन्य कारबाहीको विकल्पमाथि विचार गरिरहेको छ। यद्यपि, ट्रम्पले अन्तिम निर्णय भने गरेका छैनन्।

साउदी सरकारी समाचार एजेन्सी एसपीएका अनुसार युवराज सलमानले क्षेत्रीय सुरक्षा र स्थायित्वका लागि संवाद र कूटनीतिक प्रयासलाई प्राथमिकता दिनुपर्ने बताएका छन्। वार्ताका क्रममा अमेरिका–साउदी द्विपक्षीय सम्बन्धबारे पनि छलफल भएको जनाइएको छ।

यसैबीच, इरानले अमेरिका वा इजरायलबाट आक्रमण भए त्यसको कडा र समानुपातिक जवाफ दिने चेतावनी दिएको छ। उता कतारको मध्यस्थतामा इरान, अमेरिकी प्रतिनिधि र ओमानका अधिकारीबीच होर्मुज जलडमरूमध्य पुनः सञ्चालन गर्ने विषयमा वार्ता भइरहेको बताइएको छ।

विश्लेषकहरूले कूटनीतिक पहल जारी रहे पनि होर्मुज जलडमरूमध्य र सुरक्षा सम्बन्धी मुद्दामा स्पष्ट सहमति नहुँदासम्म क्षेत्रीय तनाव पूर्ण रूपमा कम भएको मान्न नसकिने बताएका छन्।