पाकिस्तानका रक्षामन्त्री ख्वाजा आसिफले पाकिस्तान प्रशासित कश्मीर (पीओके) मा सरकारविरुद्ध प्रदर्शन गरिरहेका नागरिकलाई भारतजस्तै शत्रुको संज्ञा दिएका छन्। उनले यस्ता प्रदर्शनकारीसँग कुनै पनि प्रकारको वार्ता नगर्ने बताएका छन्।

पीओकेमा चुनावविरोधी प्रदर्शनका क्रममा प्रहरीको गोली लागेर ३० जनाको मृत्यु र ५० भन्दा बढी घाइते भएपछि आसिफको यस्तो भनाइ आएको हो। प्रदर्शनपछि क्षेत्रमा अतिरिक्त सेना तथा सुरक्षा बल परिचालन गरिएको छ भने धारा १४४ लागू गरी इन्टरनेट सेवा बन्द गरिएको छ।

ज्वाइन्ट आवामी एक्शन कमिटी (जेएएसी)को नेतृत्वमा भएको प्रदर्शनमा पीओके विधानसभाका १२ शरणार्थी सिट खारेज गर्न माग गरिएको थियो। प्रदर्शनकारीले ती सिटमार्फत पाकिस्तानका राजनीतिक दलहरूले पीओकेको राजनीतिमा हस्तक्षेप गर्ने आरोप लगाउँदै आएका छन्।

सरकारले भने प्रदर्शनकारीले सुरक्षाकर्मीमाथि आक्रमण गरेपछि मात्र जवाफी कारबाही गरिएको दाबी गरेको छ। पीओके विधानसभामा रहेका शरणार्थी सिटको व्यवस्थालाई लिएर लामो समयदेखि विवाद जारी छ।