अमेरिकी राष्ट्रपति डोनाल्ड ट्रम्पले क्यानडाबाट आयात हुने विभिन्न वस्तुमा ५० प्रतिशत भन्सार (ट्यारिफ) लगाउने घोषणा गरेका छन्। अमेरिकाले क्यानडाले अमेरिकी सवारीसाधन, दुग्धजन्य पदार्थ र मदिराप्रति असमान व्यवहार गरेको आरोप लगाउँदै यो निर्णय गरेको हो।

नयाँ ट्यारिफ ३० दिनपछि लागू हुनेछ। यससँगै उत्तर अमेरिकी दुई छिमेकी मुलुकबीचको व्यापारिक तनाव थप चर्किएको छ।

क्यानडाका प्रधानमन्त्री मार्क कार्नीले भने आगामी केही साताभित्र अमेरिकासँगको व्यापार वार्तालाई थप तीव्र बनाउने बताएका छन्। सामाजिक सञ्जाल एक्समार्फत उनले अमेरिकाले एकपछि अर्को गर्दै क्यानडा–अमेरिका–मेक्सिको स्वतन्त्र व्यापार सम्झौताको भावना विपरीत एकपक्षीय व्यापारिक कदम चालिरहेको आरोप लगाए।

नयाँ शुल्क वाइन, हक्की स्टिकलगायत दैनिक उपभोग्य वस्तुदेखि व्यावसायिक सिमेन्टजस्ता औद्योगिक सामग्रीमा लागू हुनेछ। तर ऊर्जा, पोटास, महत्वपूर्ण खनिज तथा माछाजस्ता प्रमुख निर्यात वस्तु भने यसबाट छुट दिइएको छ।

अमेरिकाले यसअघि नै क्यानडाली स्टिल, एल्युमिनियम र तामामा १५ देखि ५० प्रतिशतसम्म ट्यारिफ लगाउँदै आएको छ। साथै सफ्टवुड काठमा ३५ प्रतिशत र सवारीसाधनमा प्रयोग हुने गैर(अमेरिकी पार्टपुर्जामा २५ प्रतिशत शुल्क कायम छ।

यसको जवाफमा क्यानडाले पनि अमेरिकी स्टिल, एल्युमिनियम र केही सवारीसाधनमा २५ प्रतिशत प्रतिशोधात्मक ट्यारिफ लगाएको छ।

नयाँ निर्णय केही दिनअघि राष्ट्रपति ट्रम्पले क्यानडाबाट फैलिएको डढेलोको धुवाँ अमेरिकी सहरसम्म पुगेको भन्दै थप ट्यारिफ लगाउने चेतावनी दिएपछि आएको हो।