जनकपुरधाम, २१ जेठ २०८३ — मधेस प्रदेशमा करिब १६ प्रतिशत बालबालिका कुपोषणको समस्याबाट प्रभावित रहेको तथ्याङ्क सार्वजनिक भएको छ। अशोक भण्डारी का अनुसार पोषण अवस्थाको परीक्षण अभियानमार्फत उक्त तथ्य पत्ता लागेको हो।

स्वास्थ्य निर्देशनालय, मधेस प्रदेश ले प्रदेशका १३६ मध्ये १३३ स्थानीय तहमा सञ्चालन गरेको परीक्षणमा दुई लाख ८३ हजार ३०८ बालबालिकाको स्वास्थ्य अवस्था मूल्याङ्कन गरिएको थियो।

तथ्याङ्कअनुसार ३५ हजार ८८३ जना बालबालिका कुपोषित, आठ हजार ७७१ जना शीघ्र कुपोषित तथा दुई लाख ३३ हजार १८२ जना सामान्य अवस्थामा रहेका छन्। यसरी कुपोषित र शीघ्र कुपोषित बालबालिकाको संख्या ४४ हजार ६५४ पुगेको छ, जुन परीक्षण गरिएका कुल बालबालिकाको १५.७६ प्रतिशत हो।

कृष्णप्रसाद यादव ले गरिबी, अशिक्षा, पोषणसम्बन्धी चेतनाको कमी, सरसफाइको अभाव तथा असन्तुलित खानपानका कारण प्रदेशमा कुपोषणको समस्या जटिल बन्दै गएको बताए।

त्यस्तै, डा प्रमोद यादव ले कृषि उत्पादनमा सम्पन्न मानिने प्रदेशमा समेत बाल कुपोषण उच्च हुनु चिन्ताको विषय भएको उल्लेख गरे।

विश्व स्वास्थ्य सङ्गठनको मापदण्डअनुसार मधेस प्रदेशको यो अवस्था सङ्कटपूर्ण मानिने बताइएको छ। साथै, नेपालका करिब २९ प्रतिशत बालबालिका मधेस प्रदेशमै जन्मिने र देशको कुल जनसङ्ख्याको झन्डै २२ प्रतिशत हिस्सा यही प्रदेशमा बसोबास गर्ने तथ्यले समस्या थप गम्भीर रहेको देखाएको छ।