डडेल्धुरा — डडेल्धुराको परशुराम नगरपालिका–५ बाट सशस्त्र प्रहरीका एक जवानसहित दुई जना बेपत्ता भएका छन्। बेपत्ता हुनेमा परिगाउँस्थित सशस्त्र प्रहरी बलको बोर्डर आउट पोस्ट (बिओपी) मा कार्यरत प्रहरी जवान ओमप्रकाश पुन मगर र स्थानीय ५६ वर्षीय तीर्थबहादुर थापा मगर रहेका छन्।

जिल्ला प्रहरी कार्यालय डडेल्धुराका अनुसार शुक्रबारदेखि सम्पर्कविहीन रहेका दुवै जना मामाभान्जा नाता पर्ने बताइएको छ।

प्रहरी नायब उपरीक्षक (डीएसपी) बरुणबहादुर सिंहले बेपत्ता दुवै जनाको खोजी कार्य तीव्र रूपमा भइरहेको जानकारी दिए। उनका अनुसार महाकाली नदी किनारमा उनीहरूले प्रयोग गरेको ट्युब फेला परेको छ। उक्त ट्युब फेला परेपछि उनीहरू नदीमा बगेको हुन सक्ने आशंका गरिएको छ।

घटनाबारे थप जानकारी जुटाउने तथा बेपत्ता व्यक्तिहरूको खोजी गर्ने कार्य जारी रहेको प्रहरीले जनाएको छ। खोजीमा सुरक्षा निकायका टोली परिचालन गरिएका छन्।