लेबनानको बालबेक सहरमा इजरायलले गरेको हवाई आक्रमणमा एक चारतले आवासीय भवन ध्वस्त हुँदा कम्तीमा पाँच जनाको मृत्यु भएको छ । लेबनानी सरकारी समाचार एजेन्सी नेशनल न्यूज एजेन्सी (एनएनएन)का अनुसार उक्त घटनामा थप १५ जना घाइते भएका छन् ।

बुधबार बिहान भएको आक्रमणपछि उद्धार टोलीहरू भग्नावशेषमुनि पुरिएका परिवारहरूको खोजी तथा उद्धारमा जुटेका छन् । घटनाबारे स्वतन्त्र पुष्टि हुन बाँकी रहेको अन्तर्राष्ट्रिय सञ्चारमाध्यमहरूले जनाएका छन्, र इजरायली सेनासँग प्रतिक्रिया मागिएको छ । 

यसैबिच, लेबनानको स्वास्थ्य मन्त्रालयले राजधानी बेरुतको दक्षिणतर्फ रहेको अरामुन क्षेत्रमा भएको अर्को हवाई आक्रमणमा कम्तीमा छ जनाको मृत्यु भएको जनाएको छ ।

एनएनएनले बेरुत नजिकैको हाजमिएहस्थित एक होटल तथा दक्षिण लेबनानका विभिन्न स्थानमा पनि इजरायली प्रहार भएको खबर दिएको छ । उता, इजरायली सेनाले दक्षिण लेबनानका एक दर्जनभन्दा बढी गाउँ र सहरका बासिन्दालाई तत्काल खाली गर्न नयाँ आदेश जारी गरेको छ । ती क्षेत्रहरूमा मुख्यतः हेजबुल्लाहका लक्ष्यविरुद्ध कारबाही केन्द्रित गरिएको इजरायलको भनाइ छ ।