लमजुङ ।बेसीशहर नगरपालिका वडा नं. ९ का वडा अध्यक्ष खुशिजङ्ग गुरुङले हालै व्यक्त गरेको राजनीतिक सन्देशले स्थानीय स्तरमा ठूलो तरंग पैदा गरेको छ। आफ्नो कार्यकालमा वडाभित्र लोभलाग्दो विकास गरेर जनताको मन जित्न सफल गुरुङको पछिल्लो अभिव्यक्तिले वेसिसहर क्षेत्रको चुनावी नतिजा उनकै प्रभाव वरिपरि घुम्ने संकेत देखिएको छ। "भोट जनताले आफैँ बुझेर दिन्छन्" भन्ने उनको सन्देशलाई स्थानीयले एउटा आत्मविश्वासी र विकासप्रेमी नेताको उद्घोषका रूपमा लिएका छन्। वडामा उनले गरेको पूर्वाधार निर्माण, पारदर्शिता र जनपक्षीय कार्यका कारण अहिले वडा नं. ९ मात्र नभई समग्र बेसीशहर क्षेत्रमै खुशिजङ्गले जुन पक्षलाई समर्थन गर्छन्, जनमत त्यतै ढल्किने आकलन गर्न थालिएको छ।

वडा अध्यक्ष गुरुङले आफूले वडाका बस्तीहरूसम्म सडक सञ्जाल पुर्‍याएर उम्मेदवारहरूलाई घरदैलो गर्न "सललल गाडी गुड्ने" बनाइदिएको उल्लेख गर्दै मतदाताहरू अब सचेत भइसकेको बताउनुभएको छ। उहाँले जनतालाई कसैले भ्रममा पार्न नसक्ने र उनीहरूले विकास गर्नेलाई नै रोज्ने दाबी गर्नुभएको छ। पछिल्ला वर्षहरूमा संघीय सरकारबाट आफ्नो वडाले उचित बजेट नपाएर अपमानित हुनुपरेको पीडा पोख्दै उहाँले अबको मतदान विकासका बाधकहरू विरुद्ध र समृद्धिको पक्षमा हुनुपर्ने सन्देश दिनुभएको छ। यो सन्देशले केन्द्रको उपेक्षा भोगिरहेका स्थानीय बासिन्दाहरूलाई झन् संगठित बनाएको छ।

खुशिजङ्गको कार्यशैली र विकासप्रतिको हुटहुटीले गर्दा उनलाई पार्टीको घेराभन्दा बाहिरका सर्वसाधारणले समेत उत्तिकै विश्वास गर्ने गरेका छन्। ठेकेदारको ढिलासुस्ती र अनियमितता विरुद्ध चट्टानी अडान लिने गुरुङको स्वभावले गर्दा नै बेसीशहर नगरपालिकाका अन्य वडाहरूमा समेत उनको चर्चा र क्रेज बढ्दो छ। स्थानीय राजनीतिक विश्लेषकहरूका अनुसार, खुशिजङ्गले आफ्नो वडामा गरेको कामको नतिजा यति प्रभावकारी छ कि, त्यसकै आधारमा उनले आह्वान गरेको ठाउँमा मत खस्ने निश्चित जस्तै देखिएको छ। उनको विकासमुखी छविका अगाडि परम्परागत राजनीतिक नाराहरू फिक्का बन्दै गएका छन्।

बेसीशहर क्षेत्रमा एक जिम्मेवार र सचेत युवा नेताका रूपमा स्थापित भइसकेका गुरुङले व्यक्ति वा दलभन्दा माथि उठेर विकासको माध्यमलाई रोज्नुपर्ने जुन अडान लिनुभएको छ, त्यसले मतदातालाई सोच्न बाध्य बनाएको छ। "जसले काम गर्छ, उसैलाई जनमत" भन्ने भाष्य उनकै कारण बलियो बन्दै गएको छ। यसर्थ, आगामी निर्वाचनमा खुशिजङ्ग गुरुङले लिने राजनीतिक बाटो र उनले गर्ने आह्वान नै बेसीशहरको चुनावी परिणामका लागि निर्णायक हुने स्थानीयको ठम्याइ छ। विकासको जगमा उभिएको उनको यो नेतृत्वदायी भूमिकाले लमजुङको राजनीतिमा नयाँ र सकारात्मक संस्कारको सुरुवात गरेको छ।