बैतडी — बैतडीमा चलिरहेको बसको ढोकाबाट खसेर एक जनाको मृत्यु भएको छ। महेन्द्रनगरबाट बैतडीतर्फ आइरहेको सु.प.प्र. ०२००१ ख १०१७ नम्बरको बसबाट खसेर दशरथचन्द नगरपालिका–८ त्रिपुराका ६५ वर्षीय पदमराज भट्टको ज्यान गएको हो।

जिल्ला प्रहरी कार्यालय बैतडीका प्रवक्ता प्रहरी निरीक्षक सुरज सिंहका अनुसार दशरथचन्द राजमार्गअन्तर्गत दशरथचन्द नगरपालिका–१ गुरुखोलास्थित मोडमा आज साँझ करिब ४ः४० बजे बसको ढोकाबाट खसेर भट्ट गम्भीर घाइते भएका थिए।

घाइते भट्टलाई तत्काल उपचारका लागि जिल्ला अस्पताल बैतडी पुर्‍याइएको थियो। तर अस्पताल पुग्नेबित्तिकै चिकित्सकले उनलाई मृत घोषणा गरेको प्रहरीले जनाएको छ।

जिल्ला अस्पताल बैतडीका सूचना अधिकारी हरिश पन्तका अनुसार भट्टको टाउकोमा गम्भीर चोट लागेको थियो भने कानबाट अत्यधिक रक्तस्राव भएको थियो। सोही कारण उनको मृत्यु भएको हुन सक्ने प्रारम्भिक अनुमान गरिएको छ।

घटनापछि बस र चालक दशरथ महरालाई नियन्त्रणमा लिइएको जिल्ला प्रहरी कार्यालयले जनाएको छ। घटनाका सम्बन्धमा थप अनुसन्धान भइरहेको प्रहरीले जनाएको छ।