आगामी फागुन २१ गते हुने प्रतिनिधिसभा सदस्यको निर्वाचन गराउन सुदूरपश्चिम प्रदेशका मतदान केन्द्रमा कर्मचारीको व्यवस्थापन गर्ने काम भइरहेको छ ।

प्रदेश निर्वाचन कार्यालय कैलालीका अनुसार मतदान केन्द्रमा निर्वाचन गराउन सङ्घ, प्रदेश र पालिका तहका कर्मचारी, सरकारी स्वामित्वका कार्यालय, बैंक तथा वित्तीय संस्थाका कर्मचारी खटाउने गरी जनशक्ति व्यवस्थापन गर्ने काम भइरहेको छ ।

कार्यालय प्रमुख प्रेमराज भट्टले प्रत्येक मतदान केन्द्रमा एक निर्वाचन अधिकृत, एक सहायक निर्वाचन अधिकृत, एक सहायक कर्मचारी र स्वयमसेवक गरी सात जनासम्म खटाउने गरी व्यवस्थापन भइरहेको र अपुग भएमा शिक्षकलाई पनि खटाउने तयारी रहेको बताए ।

प्रदेशका १६ निर्वाचन क्षेत्रका दुई हजार १९९ मतदान केन्द्रमा निर्वाचन गराउन कूल १५ हजार ३९३ जनशक्ति आवश्यक पर्ने कार्यालय प्रमुख भट्टले जानकारी दिए । जिल्लागत रुपमा पाँच निर्वाचन क्षेत्र रहेको कैलालीमा चार हजार४८७, तीन निर्वाचन क्षेत्र रहेको कञ्चनपुरमा दुई हजार५२० र दुई निर्वाचन क्षेत्र रहेको अछाममा एक हजार४९१ कर्मचारी परिचालन गर्न लागिएको छ ।

यस्तै एक निर्वाचन क्षेत्र रहेको डोटीमा एक हजार २६०, दार्चुलामा एक हजार एक, डडेलधुरामा नौ सय ८७, बाजुरामा आठ सय २६, बझाङमा एक हजार ३२३ र बैतडीमा एक हजार ४९८ कर्मचारी खटाउन लागिएको छ । प्रदेशका सबै नौ जिल्लामा गरी एक हजार १७६ मतदान स्थल र दुई हजार १९९ मतदान केन्द्रको व्यवस्था गर्न लागिएको छ ।

प्रदेशमा पुरुष मतदाताभन्दा महिला मतदाताको सङ्ख्या बढी छ । आठ लाख ६४ हजार ४२३ महिला र आठ लाख ५२ हजार २१९ पुरुष समेत गरेर कूल १७ लाख १६ हजार ६६० मतदाता छन् । अन्य मतदाता १८ जना छन् । पछिल्लो समय गरिएको मतदाता नामावली सङ्कलनका क्रममा ४६ हजार २० मतदाता थपिएका थिए ।

जिल्लागत रुपमा कैलालीमा पाँच लाख ५१ हजार ५२, कञ्चनपुरमा तीन लाख १४ हजार ३८५, अछाममा एक लाख ६५ हजार ३३७, डडेलधुरामा ९३ हजार ४०३, बैतडीमा एक लाख ५६ हजार ३७२, दार्चुलामा ९२ हजार ९४८, डोटीमा एक लाख २८ हजार ३९९, बझाङमा एक लाख २६ हजार ९०३ र बाजुरामा ८७ हजार ८६१ मतदाता रहेका छन् ।

विसं २०७९ को प्रतिनिधिसभा सदस्य निर्वाचनमा कैलाली–४ र ५ तथा  डडेलधुरा, बाजुरा, दार्चुला, कञ्चनपुर–२ र ३, अछाम–२ मा नेपाली काग्रेस विजयी भएको थियो । यस्तै डोटी, बझाङ र अछाम–१ मा नेकपा (एकीकृत समाजवादी) विजयी भएको थियो । तत्कालीन नागरिक उन्मुक्ति पार्टी कैलाली–१, २ र ३ मा विजयी भएको थियो भने नेकपा ९एमाले० कञ्चनपुर– १ र बैतडीमा विजयी भएको थियो ।