लोकसेवा आयोग सुर्खेत कार्यालयद्वारा सञ्चालित प्रहरी जवान (जनपद) पदको लिखित परीक्षामा सहभागी १२ जनालाई नक्कली परीक्षार्थीको आरोपमा प्रहरीले पक्राउ गरेको छ । 

२०८२ माघ १७ गते सञ्चालन भएको परीक्षामा अर्काको नाममा आर्थिक लाभ लिएको, सक्कली परीक्षार्थीको नागरिकता तथा प्रवेशपत्रमा फोटो र हस्ताक्षर परिवर्तन गरी किर्ते कागजात प्रयोग गरेर परीक्षामा सहभागी भएको अवस्थामा उनीहरूलाई फेला पारी पक्राउ गरिएको जिल्ला प्रहरीले जनाएको छ ।

पक्राउ परेका व्यक्तिहरूमाथि लिखत किर्ते तथा आपराधिक लाभ सम्बन्धी कसुरमा अनुसन्धान भइरहेको प्रहरीले जनाएको छ ।  पक्राउ पर्नेमा जाजरकोट, दैलेख, सुर्खेत र बाँके जिल्लाका विभिन्न स्थानीय तहका १२ जना रहेका छन् । तीमध्ये केही नक्कली परीक्षार्थी, केही वास्तविक परीक्षार्थी तथा एक जना मतियार रहेको प्रहरीको भनाइ छ । घटनाबारे थप अनुसन्धान जारी रहेको प्रहरीले जानकारी दिएको छ।